Shillong, Ïaiong 22: Ki riewngeit Muslim kiba don ha ka jylla Meghalaya, ha ka sngi Saitjai ki la rakhe ïa ka Eid-ul-Fitr da kaba leit ïashim bynta haka jingleh niam kaba la pynlong ha ki Mosque kiba don ha kylleng ki jaka.
Lah ban ong, ba ka jingrakhe ïa ka Eid kaba heh tam kadei ha nongbah Shillong ha Madina Masjid, Laban, ha kaba da ki hajar ngut ki riewngeit Muslim leit sha ki Masjid ban ïashim bynta ha kane ka sngi kaba khraw, ban pyndonburom ïa u Prophet Muhammad, hadien ba la kut u bnai Ramadan uba dei u bai shah jingit jong ki.
Hadien ba la dep ka jinglehniam lehrukom, ki riewngeit Muslim ki ai khublei mar kylliang bad ki la ai jingïarap ruh ïa kiba duk ha kum kane ka sngi kaba kyrpang bad hadien kane ki leit ruh sha ki ïing ki sem jong ki bahaïing ne ki paralok ban ai khublei ïa ki bad ban ïa bam sngewbha ha kane ka sngi lehkmen. Lah ban kdew ruh ba na ka liang u Myntri Rangbah ka jylla, u Lamphang bad u Lat ka jylla ki la ai khublei ïa baroh ki riewngeit Muslim ha kane ka sngi khuid jong ki riewngeit Muslim.
