Shillong,Nailur 08 : Ka long ka lad kaba paka na ka bynta kito ki khynnah kiba donsap ha ki kam lehkai sports hapoh ka jylla, ha kaba na ka liang jong ka Sports Authority Of India (SAI) lyngba ka Residential bad Non Residential Scheme, shen kan sa ïoh ban pynlong ïa ka jingjied khynnah ban pynrung hapoh ka SAI bad STC, kiba kynthup ha ka Archery, Athletic & Boxing, Judo, Karate; Football.
Ka jingjied ïa kine ki khynnah kan long katkum ka jinglah ka jong ki ban pynpaw ïa ka sap kaba maki ki don la ka dei ha kino kino ki jait Sports kiba ka ka SAI ka donkam. Yn bishar ruh lyngba ki rekod kiba kine ki nongïalehkai ki la ïoh ban khur ha rynsan ïakop jong ki tournament kiba la paw. kum ha ka kyrdan Inter National , National , bad State & District Level bad ruh lyngba ki test a katkum ka snem bad ka sap kaba ki don ha ki jait sports ba ki shim bynta.
Ki nongïalehkai kiba ju shimbynta ha ki lympung bapher bapher ki donkam ban wanrah ïa 2 tylli ki dur passport size bad dang shen lem bad ka Aaddhar card, ka Birth certificate bad ruh ki certificate kiba la ïohpdiang na ki jingïalehkai sports.
Ka rta jong U/Ka ka dei ban long shajrong 12 snem haduh 18 snem, 01-04-2023, na bynta ki jingïalehkai shi kynhun: kan long 10 snem haduh 14 snem kum. 15 snem haduh 18 snem. Shuh shuh, ki nongïalehkai kiba tbit hynrei kiba la palat lane duna ïa ka snem ba la buh kin nym shah kyntait.
Na ka bynta ki jingïalehkai ba marwei:- kiba la ju kiew rynsan teng ha ki kyrdan ba hakhmat ha ki District Championships, Inter- Education District Level competitions, championships ba la pynlong da ka Confederations of Public Schools, CBSE, Kendriya Vidyalayas, Navodaya Vidtalayas, PYKKA ba kiwei kiwei.
Na ka bynta ka Team Event: – Ki nongïalehkai kiba la ju shimbynta ha ki jingïakop kum ka State level ba la pynïaid da ka State Sports Associations, State Sports Council, School Game National bad ka State Sports Departments ki lah ban shimbynta ha kane ka jingjied nongïalehkai ka SAI. Ki nongïalehkai ki donkam ruh ïa ka Medical Fitness Certificate.
Ka jingpynrung ïa ki nongïalehkai ba tbit hapoh ka SAI yn sa pynthikna hadien ba ladep ban bishar bñiah ïa ka rta bad ruh ka medical examination jong ki.
Na ka bynta ka jingjied nongïalehkai ha ka Archery, Karate, Boxing, Judo (shynrang & kynthei) hapoh ka scheme Residential & Non Residential, SAI; yn pynlong ïa ka jingjied ha madan Sports Authority of India kaba ha NEHU Campus Shillong ha ka 18-19 tarik Nailur, ha ka por 8 baje mynstep (12 haduh 18 snem ).
Na ka bynta ki Athletic (shynrang bad kynthei ), kiba hap hapoh ka SAI, Residential Scheme, kan long ha ka 14 bad 15 tarik Nailur, 2023; 8.00 baje mynstep, (12 haduh 18 snem).
Ha ka Football ( kaba dei tang na ka bynta ki shynrang) kaba hap hapoh ka SAI, Residential & Non Residential Scheme; yn pynlong ïa ka jingjied ha madan SAI, NEHU Campus Shillong, ka ban sdang naduh ka 20 haduh 23 tarik Nailur, ka por kan long naduh 8 baje mynstep na ka bynta kiba shajrong 10 snem bad hapoh 14 snem, bad ruh na ka bynta kiba shajrong 15 snem bad 18 snem shapoh.
