Mawkyrwat, ‘Nailur 08: Ka Mawkyrwat Division Sports Association (MDSA) mynta ka sngi ka la ïoh ban sdang ïa ka lympung ïalehkai kynjatbol kaba la tip kum ka 1st bad ka Super Divisions ha kaba u bah T. Lyngwa, IAS, Deputy Commissioner, South West Khasi Hills District u la long kum u kongsan bad kaba la pynlong ha madan Artificial Turf, MDSA Nonglang, South West Khasi Hills District.
Ha jingïalehkai jong ka 1st Division la jop noh da ka Snapkirang Football Club da kaba ka la thep da 1 – 0 kol pyrshah ïa ka Photjaud Sports & Cultural Club ha kaba u Pynskhemlang L. Mawlot u la ïoh ban thep ha ka minit kaba 52 jong ka kyllamiet.
Katba ha ka jingïalehkai kaba dei ha ka Super Division pat ka Mawten Sports Club bad ka Jakrem Sports Club ki la ïa khaid khlem da ïoh ban ïa pynkhih jar wat kawei ruh.
Lah ban kdew ba ha kane ka lympung ïalehkai, ki don mynta 8 kynhun ha ka Super Division bad 12 kynhun ha ka 1st Division.
Ha ka jingïalang ba lyngkot, u bah T. Lyngwa, IAS, Deputy Commissioner, South West Khasi Hills District uba long ruh kum u Chairman jong ka Mawkyrwat Division Sports Association (MDSA) u la pynpaw ka jingaikhublei na ka bynta ka Football Committee jong ka MDSA kaba la pynlong ïa kum kane ka lympung jingïalehkai kaba long shibynta ban pynmih ïa ki ‘rangïalehkai kiba tbit bad ym tang kata ki la don ruh shibun ki nongïalehkai kiba a ïoh ban leit ïashimbynta ha kiwei de ki jaka ruh.
Namarakta, u ai mynsiem na ka bynta ki ‘rangïalehkai kiab dei na ki shnong baoher bapher hapoh ka South West Khasi Hills District ba kim dei ban pynleh noh ei ïa ka sap ka phong ba ki don hynrei ba kin nang ïai trei shitom ryngkat ka thong ha ka jingim khnang ba kin nym kut tang hangne hynrei ba kin nang kiew sha kiwei de ki kyrdan jong ka jingïalehkai.
Kiba ïadonlang ryngkat ha kane ka sngi plie pyrda ki kynthup ïa u bah A.L. Bareh, MCS, EAC, South West Khasi Hills District, u bah K.L. Lyngdoh, Chairman Football Committee jong ka MDSA ki Nongkitkam jong ki Sports Club, u bah Khrawkupar Shangdiar, Secretary Football Committee jong ka MDSA lem bad ki nongkitkam ka MDSA bad ruh ki paidbah nongkyrshan.
