Shillong, Lber, 10: Ki Balang Khristan ha ka Jylla Meghalaya mynta ki la pynkhreh ban ïatreilang na ka bynta ban pyrshah ïa ka Uniform Civil Code (UCC) kaba la thmu ban pyntreikam da ka Sorkar Pdeng lyngba ka Aiñ-rew kaba la don mynta ha Parliament.
Ki khubor ki ïathuh ba ki nongïalam jong ki Balang Khristan ki la pynkhreh ban ïakren sani ïa kane ka kam ban leit ïakynduh ïa ki bor synshar jong ka Meghalaya da kaba wanrah da ka Resolution ha Ïingdorbar Thawaiñ jong ka jylla ban pyrshah ïa kane ka Aiñ-rew kumba la leh da ka Mizoram Legislative Assembly.
Ka UCC ka dei kaba la don ha ka Riti Synshar jong ka ri India da ka jingthmu ban wanrah ïa ka jingïatylli ha ka ri India da kaba bud tang ïa kawei ka aiñ na ka bynta ki nongshongshnong jong ka ri. Hynrei kane ka jingthmu kam shym la urlong namar ka jingdon ki kynhun jaidbynriew bad ki kynhun niam bapher bapher kiba don la ki jong ki riti ki dustur bad ki rukom ngeit.
Watla na ka liang jong ka KJP Synod Sepngi ruh ka la shimkhia ìa kane ka kam da kaba ka la pynmih da ka jingthoh ban pynshai halor ka Uniform Civil Code bad ïa ka jingktah jong ka. Ïa kane ka jingthoh la pdiang ruh da ka Dorbar Synod kaba la long ha ka Balang Lyngkhoi.
Kiwei kiwei ki kynhun Balang ruh la sngewthuh ba ki la shimkhia ïa kane da kaba sheptieng ba ka jingpyntreikam ïa ka aiñ kan ktah ìa ka hok jingngeit ne jingtreikam ki dkhot ka Balang.
Kumba long mynta ka Aiñ-rew jong ka UCC ka dang don ha Rajya Sabha bad ha ka 9 tarik, Nohprah 2023 la wanrah ïa ka Private Member’s Bill da uwei u MP jong ka BJP.
Ka Rajya Sabha ka la pdiang ban ïatai ïa kane ka Aiñ-rew wat hapdeng ka jingpyrshah na kiba bun ki MP. Hynrei la pdiang lyngba ka jingïañiew khlieh briew.
Katkum ka jingpynïaid kam ha Parliament, kane ka Aiñ-rew ka don ha kata ba ki ong ka Listed Bill bad hadien kane kan sa don biang ka Voting kano na kine ki Bill ba la pdiang ban ïakren kan ïoh lad ban ïakren nyngkong
Shuh shuh la ong ba namar ka UCC ka don ha ka Manifesto ka seng BJP kaba ìalam ïa ka Sorkar Pdeng, khlempep ka UCC Bill kan ïoh ïa ka jingkyrshan ban ïatai ha Parliament.
