Ban ïa ki drok kiba ïohkem ha ki 50 snem ba la leit, tam duh ka jingïoh kurup ha kine 6 bnai : DGP

Shillong, Lber 10: U Director General of Police (DGP) u Dr LR Bishnoi ha ka Thohdieng u la ïathuh ba ka jingshimkhia ki pulit ban thwet ïa ka jingjyllei u drok ha ka jylla ka pynlong ba ka jingïohkem drok ha kine ki 6 bnai ba la leit ka kham palat ban ïa ki drok kiba la ïohkem ha kine ki 50 snem kiba la leit naduh ba la ïoh ïa ka jylla. U la ong u drok ba la kurup ha u 2022 u shongdor kumba 50 klur eiei.
Haba kren sha ki lad pathai khubor u Dr LR Bishnoi u la ïathuh ba ha u snem 2022, ki pulit ki la ïoh kurup kumba 7 kilo u drok heroin uba shongdor 45.22 klur bad 27,000 bitor ki dawai jyrhoh ba shongdor kumba 1.38 klur, u kynja la jan kumba 4 ton, u opium 600 gram, ki dawai kuli methamphetamine 12,800 kuli, bad ong ba kane ka jingïoh kurup ka kham palat ban ïa ka jingïohkem ha ki 50 snem.
“Ha kine ki 70 sngi kiba la leit, 80 ngut ki briew ngi la ïoh kem ha ryngkat u drok heroin kumba 3 kilo, u kynja 140 kilo, 60,000 ki dawai kuli, 22,000 bitor ki dawai jyrhoh bad ka pisa kumba 28 lak,” ïathuh u DGP.
U Dr LR Bishnoi u la ïathuh ba ha u snem 2022 ki pulit ki ujor mokotduma haduh kumba 116 tylli hapoh ki kyndon ka Narcotic Drugs and Psychotropic Substances Act, 1985 bad ong ba kane ka la pynkheiñ ïa ki rekod jong baroh ki snem naduh ba seng ïa ka jylla.
U la ïathuh ruh ba ki pulit ki la ïoh ban kem haduh kumba 234 ngut ki briew ha kaba 20 ngut ki dei ki kynthei ha u snem 2022 kiba suba donkti ha ka dih bad khaïi drok bad ong ba kane ruh ka dei ka jingïohkem kaba bun eh ban ïanujor bad ki snem kiba la leit noh.
“Ngi la ïoh ban kurup kumba 60 tylli ki kali kiba la pyndonkam da ki nong khaïi drok ha u snem 2022,” ong u DGP.
Shuh shuh u la ïathuh ba kumba 25 na ka 100 kiba shah kem kine ki nongkhaïi drok ki dei na kiwei pat ki jylla ba kynthup na ka jylla Tripura, Mizoram, Manipur, Punjab, Bihar bad West Bengal.
U DGP u la ïathuh ba kham bynsien kine ki nongkhaïi drok ki ïoh jamin noh khlem shah rai pynrem na ka daw ka jingslem ban ïoh ïa ka kaiphot jong ki nongmuna jong u drok ba phah sha Forensic Laboratories ban ai kaiphot khnang ban ïoh ai jingtip sha ïing kashari halor ki drok ba ïoh kurup na ki.
U la ïathuh ruh ba khnang ban teh lakam ïa ka jingjyllei u drok ha ka jylla na ka liang ka tnat pulit ka la thaw da ka Supervisory Committee ba la khlieh da u SP (CID) ban buddien ïa ki kam ha kaba ïadei bad ki kam drok khnang ban lah ban pynsted ïa ka jingpynngat kyndon (chargesheet) ïa ki nongkhaïi namar bunsien ki ïoh jamin noh na ka daw ka jingslem ban chargesheet.