Shah kem 13 ngut bad lai ngut ki nongtrei MeECL ba ïasylla thang ïa ka ïing u Waheh Shnong

Shillong, Lber, 10: Khatlai ngut ki briew bad kynthup lai ngut ki nongtrei jong ka Meghalaya Energy Corporation Limited (MeECL) ki la shah kem ha ki Pulit jong ka East Jaiñtia Hills District halor ka jingdonkti ban thang ïa ka ïing jong uwei u Waheh Shnong barim jong ka shnong Rymbai kaba hap hapoh u pud u sam jong ka East Jaiñtia Hills District.
Kane ka la jia ha ka 8 tarik mynta u bnai ha ka shnong Rymbai Ïawpynsin ha ka por 10:45 baje mynmiet. Ha kane ka jingjia, ïa u Deishim O Lamurong na ka shnong Rymbai Shynrang Sakhaiñ la ïoh kem da ki paidbah nongshong shnong katba u dang wiang ding ïa ka ïing, katba ki paralok kiba donkti lang bad u ki la lait phet da ka said da kaba shim kabu ïa ka jingdum jong ka miet, la ïathuh u Superintendent of Police ka East Jaiñtia Hills District u Jagpal Singh Dhanoa.
Shuh shuh uwei u briew ïa uba la tip kyrteng kum u Heisalon Dkhar uba trei ha MeECL Control Room la suba ba u dei uba la ïasylla lang ha kane ka jingjia namarba u la pynlip ïa ka bording shwa ban thang ïa kane ka ïing.
Ha kaba ïadei bad kane ki Pulit ki register case ha Khliehriat Police Station hapoh ka kyndon 120B/307/427/436/506/34 jong ka Indian Penal Code.
“Ka jingtohkit ban lap ïa kiba donkti ban ïasylla ha kane ka kam ka la ïaid shakhmat,” ong u SP.
Haduh mynta ki don 13 ngut kiba la shah kem ha ki Pulit.
Ki nongtrei ka MeECL kiba la shah kem ki long u Heisalon Dkhar 33 snem na Rymbai Synrang Sakhaiñ, u Elius Wanniang 40 snem na Mawkyrwat bad u Rishotlang Bareh 31snem na ka shnong Khimmusniang, Jowai.
Kiwei pat kiba la shah kem ki long u Deishim O Lamurong 26 snem, u Bakstar Dkhar 32 snem, u Eborlang Nongtdu 35 snem, u Emerson Dkhar 25 snem, u Roilang Dkhar 36 snem, u Henry Shangpung 32 snem, u Thynda Lyngdoh 36 snem u Kletin Suchiang 27 snem bad u November Dkhar 24 snem.