Dei namar ka jingthied khlieh briew ba ym lah thaw Sorkar ki party bym dei BJP-NPP: Mukul

Shillong, Lber 09: U Nongïalam ka TMC uba dei ruh u Myntri Rangbah ka jylla u Dr Mukul Sangma ha ka sngi Palei u la ong ba ka jingbym lah ki party bym dei na ka BJP bad NPP ban thaw sorkar ha kane ka kynti kaba mynta ka dei namar ka jingjur ka jingthied khlieh briew da ka BJP-NPP tang ban ïoh nomor ban thaw sorkar.
“Lada phi peit bha ba ki don ki party kiba la pynpaw ïa ka jinglong ba la kloi jong ki ban ïatreilang ban thaw da ka sorkar kaba lait na ka BJP-NPP hynrei kynsan kynsan ki ryngkoh sha kawei pat ka kynhun da kaba shu jah kynsan na ka jingïalang kaba ngi la shong pyrkhat phi la sngewthuh shai kaei ka daw ba ka long kumta,” ong u Dr Mukul haba kren sha ki lad pathai khubor.
Kane ka jingkren u Dr Mukul ka long ha kaba ïadei bad ka jingpyrshang jong ki seng riewlum ban thaw sorkar da kaba pan jingkyrshan na ka Congress bad ka All India Trinamool Congress (AITC) tang hadien shisngi ba la kut ka jingñiew vote.
Ha kane ka jingïalang jong ki party bym dei na ka BJP-NPP ba la khot da ka UDP ha ka ïingsah u nongïalam ka UDP u Bah lahkmen Rymbui kaba la wan shimbynta da ki seng saiñpyrthei ba kynthup ïa ka PDF, HSPDP, VPP, Congress, AITC lem bad uwei pat u MLA shimet.
Hynrei katba kane ka jingïalang ka dang ïaid ki arngut ki MLA ka Hill State People’s Democratic Party (HSPDP) ki la shu jah la ka jah kynsan na kane ka jingïalang hynrei tang hadien khyndait minit la ïohi ba ki la leit ai jingkyrshan noh ïa ka NPP ban thaw sorkar bad kumjuh na ka liang ka UDP bad PDF tang hadien arsngi ka la leit ban ai jingkyrshan sa ma ki ïa ka sorkar NPP ban ïalam biang da u Conrad.