Shah kem san ngut ki nongkhaïi drok na Mawprem, kynthup ka longkmie ba dang ai buiñ

Shillong, Lber 10: Ki Pulit ka Anti-Narcotic Task Force (ANTF) jong ka East Khasi Hills District da ka jingïatreilang bad ki Pulit ka Lumdiengjri Police Station ha ka janmiet sngi Palei ki la ïoh kem san ngut ki nongkhaïi drok na ki bynta ka Lower Mawprem hadien ba ki la pynlong ïa ka jingpynap shrip da ka jingïoh jingtip na ki tnat syntiat ba ki nongkhaïi drok ha ki bynta ka shnong Mawprem.
Ha ka jingkhynra ha ka por mynsngi ki Pulit ANTF ki la ïoh kem ïa uwei u briew najan ka ophis treikam jong ka Khasi Hills Autonomous District Council (KHADC) ha kaba ki la ïoh kurup saw tylli ki synduk sabon ba la thep ïa u drok heroin uba don ka jingkhia 66.46 gm, 2 tylli ki mobile phone bad kawei ka kali.
Ynda la kem iongreiñ ki Pulit ANTF hadien ba ki la ïoh ïa ka jingtip kaba thikna ki la hiar ban khynra ïa kawei ka iing ha ka shnong Lumsohphoh, Lower Mawprem ha kaba ki la ïoh kem saw ngut ki briew kiba kynthup arngut ki kynthei bad arngut ki shynrang.
Kawei napdeng kine ki arngut ki kynthei kiba la shahkem ka dei kaba dang aibuiñ khun.
Ha ka jingkhynra ïa ka ing baroh kawei, ki Pulit ki la ïoh kurup 20 tylli ki synduk sabon bad 20 tylli ki tyndong ba la thep ïa u drok uba don ka jingkhia kumba 268.71 gram, 7 tylli ki Mobile Phone, ka pisa ba kot T. 6,87,150, 25 lak, ki tyndong ba thylli bad 60 tylli ki thyrnia injek.
U Director General of Police (DGP) u Dr L.R Bishnoi ha ka jingïakren bad ki lad pathai khubor ha ka sngi Thohdieng u la ïathuh ba kane ka jingïohkem ha ka jingkhynra ynda la kem iongreiñ ka la ngat ha ka thup jong ki nongkhaïi drok ba heh ha kaba kiba donkti ki lah ban ngat ha ka jingshah pynsajia da ka jingset phatok kaba lah ban kot haduh 20 snem eiei namarba ka jingïoh kurup ïa u drok uba don ka jingkhia kaba la palat 250 gram.