Kyntait u Nongaitktien ka MDA ba ka NPP bad ki paralok ki donkti ban ïa khaïi kulai

Shillong, Lber, 10: U Nongaitktien jong ka Sorkar Meghalaya Democratic Alliance (MDA-II) u Marcuise N. Marak ha ka sngi Thohdieng u la kyntait mardor ba ka National Peoples Party (NPP) bad ki paralok kiba ïatreilang ki donkti ha ka jingïakhaïi kulai.
“Kam shym don kano kano ka jingïakhaïi kulai,” ong u Marak ha ka jingïakren bad ki lad pathai khubor haba jubab ïa ka jingkylli halor ka jingkynnoh jong u Myntri Rangbah barim ka jylla u Mukul Sangma ba ki Seng Riewlum bad kynthup ka AITC bad ka Seng Congress kim shym la lah ban thaw ïa ka Sorkar, dei na ka daw ka jingïakhaïi kulai.
“Lada katto katne ngut na ki MLA ba la shah jied ki kwah ban pynïasoh bad ka Sorkar ba la ïalam da ka NPP ka dei ka kamram jong ngi ban pdiang sngewbha ïa ki. Namarkata, hangno ka don kata ka jingïakhaïi kulai? Ym don satia ka jingïakhaïi kulai,” la kren pynthikna u Marak.
Ha ka jingtreikam jong u ha ka sngi banyngkong eh kum u Myntri ka Sorkar Jylla, u Marak uba peit ruh ïa ka tnat Public Health Engineering (PHE), u la pynpaw ka jingsngew skhem ba ka Sorkar MDA kan sa nang leh bha na kaba long mynshwa.
U la ong ba ruh ba halade hi u shem ba baroh ki bhah ba la ai sha ki Myntrei ki dei kiba la sam khlem kano kano ka jingleh shiliang.
“Bun na ki Myntri ki dei kiba la don lypa ka jingtbit, khamtam kum u Bah Paul, ka Kong Ampareen bad u AT Mondal ki dei kiba la kham tbit. Kine ki Myntri ki dei kiba la pynpaw shisha ïa ka sap treikam jong ki. Namarkata, nga kyrmen ba kane ka Kynhun Myntri kan sa trei bha bad na ka liang jong nga ruh ngan sa pyrshang ban trei kham bha,” ong u Marak.