Shillong, Lber 10 : U Myntri ka tnat ri jingri ka Animal Husbandry and Veterinary u bah A.L Hek mynta ka Sngi Thohdieng, ula pynpaw ba kum u Myntri Sorkar u don ïa ka thong ban pynthikna ba ka jylla Meghalaya kan pahuh pahai noh haba ïadei bad ka jinglah ban pynmih doh.Ban leh ïa kane u la ong ba donkam ban pynkhlaiñ ïa ka kam ri jingri hapoh ka jylla naduh ki masi, blang, syiar, sniang, dohkha bad ter ter.
Haba kren sha ki lad pathai khubor u bah Hek ula ong ba bun ki paidbah nong shong shnong ka jylla ki dei kiba bam doh la ka dei doh Masi, doh sniang, doh syiar , doh blang bad dohkha hynrei baroh ki tip ba ka jylla kam lah ban pynbiang ïa ka jingdonkam doh.
U bah Hek ula ïathuh ba mynta ka sngi ula lum ka jingïalang jong ki heh ophisar ka tnat ban sngewthuh kumno ka tnat ka treikam bad kumno ban leh naka bynta ban pynthikna ba ka jylla kan lah ban pynmih pahuh ïa ka doh ban bam.
“Ka la donkam ïa ka sorkar bad ïa ka tnat Animal Husbandry and Veterinary ban wad ïa ki lad lynti kumno ban leh khnang ba ka jylla Meghalaya kan lah ban pynmih kham bun ka jingdonkam doh” la ong u Hek.
U bah Hek ula ong ba na ka liang ka tnat ka donkam ban shim khia haba ïadei bad ka jingkynnoh ba jur ka jingkhaïi tuh masi namar kane ka lah ban dei ruh kawei na ki daw ba pynduna ïa ka doh hapoh ka Jylla.
Ula ong ba watla ka jylla ka don ïa ka Piggery Mission hynrei namar ba u dang thymmai hapoh kane ka tnat um pat lah ban ong eiei kumno ban kyntiew ïa ka kam ri sniang hynrei shen un sa lum ïa ki ophisar ban sngewthuh halor ka rukom treikam kane ka Mission.
