ïamir jingmut u Myntri bad u CM ban pynthikna siew tulop ïa ki Nonghikai manla u bnai

Shillong, Lber 10 : Naduh ka sngi bala thung ïa u Rakkam A Sangma kum u Myntri ka tnat pule puthi u la ïakren bad u Myntri Rangbah ka jylla Conrad K Sangma ba ka sorkar kadei ban pynthikna ban siew ia ka tulopki nonghikai man la u bnai.
ïa kane la pyntip da u Rakkam A Sangma haba kren sha ki lad pathai khubor hadien shi sngi ba u shimti kum u Myntri ka tnat pule puthi.
U Rakkam ula ong kum u nonghikai u kwah ban kyntiew ïa ka pule puthi hapoh ka jylla bad kane kan urlong lyngba ka jingïatreilang jong baroh naduh ka Sorkar, ki MLA, ki Sengbhalang, ki Nonghikai bad ki Samla pule.
U Rakkam ula ong ba kum u Myntri ka tnat pule puthi u kwah ba baroh kin ai jingmut kumno ban kyntiew ïa ka pule puthi hapoh ka jylla.
“Ka pule puthi kadei ka ba donkam bha hapoh ka imlang sahlang bad ban kyntiew ïa ka pule puthi, donkam ban pynbit pynbiang ïa ki jingdonkam kum ki jingtei ïa ki kamra klass ba bha bad kumjuh ruh ban pynthikna ba ki nonghikai ki dei ban ïoh ïa ka jingsiew haka por ba biang” la ong u Rakkam.
U Rakkam ula ong ba ka sorkar MDA naduh 2018 ka la leh bha haba ïadei bad ka jingkyntiew ïa ka pule puthi hapoh ka jylla hynrei ka sorkar ka dang don shibun ki kam ba hap ban leh na ka bynta ban kyntiew ïaka jylla kum ka jaka pdeng haka liang ka pule puthi hapoh ka ri India baroh kawei.
Ula ong ba kum u Myntri un kyntu ruh ïa baroh ki MLA ba kin shimkhia kumno ban wanrah jingkylla haka liang ka pule puthi ha la ki jong ki constituency bad ki MLA kidei ban wan shakhmat ban ïakren lada donkam ha kano kano ka liang.
“Shen ngan sa lum ïa baroh heh ophisar ka tnat pule puthi ban tip kumno ban pyntyllun ïa ki kam khnang ba ka jylla Meghalaya kan paw biang kum pdeng haka liang ka pule ka dangle” ula ong.