Thrang u Myntri ban lah pyndep noh ïa ki project sam umdih sha baroh ki long ïing ha jylla

Shillong, Lber 10 : U Myntri ka tnat Public Health Engineering (PHE) u Marcuise N Marak mynta ka sngi Thohdieng, ula ong ba shen un sa lum ïa ki ophisar ka tnat PHE ban buddien ïa ka jinglong jingman ki projek kiba la donkam ban pyndep noh hapoh kine ki snem ban wan.
Haba kren sha ki lad pathai khubor u Marcuise ula ong ba ka sorkar pdeng kan sa pyllait pisa ban pynthikna ba baroh ki thliew ïing kin ïoh um bam um dih bad kum u Myntri un pynthikna ba ki paidbah kin ïoh nong na kane ka jingïarap pisa ka sorkar pdeng.
“La donkam ban pyntrei hok ïa baroh ki skhim kiba ka sorkar pdeng ne ka sorkar jylla ka mang naka bynta ban sam um bam umdih sha ki paidbah khnang ba ha ki 30 snem ban wan, ki paidbah kin ïoh um bam ha man ki thlliew ïing” la ong u Marcuise.
U Marcuise ula ong ba kum u Myntri un ïai buddien bad un leit jurip ruh ïa baroh ki projek ki bym pat dep ban pyntrei khang ban pynthikna ba ki kam ki ïaid beit ïaid ryntih noh nangne shakhmat.
“Haduh mynta ngam pat ïoh jingkheiñ haba ïadei bad ka jingpyntrei ïaka skhim Jaal Jeevan Mission (JJM) ha Meghalaya hynrei nga kyrmen ba ki ophisar bad ki contractor kiba don bynta ban pyntrei ïa kane ka skhim kin leh hok ïa la ka kamram naka bynta ka jingmyntoi u paidbah bad ka jylla baroh kawei” ula ong.
U Myntri ula pynpaw ruh ïa ka jingdonkam ka jingïatreilang jong baroh ban shim ka jingkitkhlieh ha ka ban pynthikna ba ki projek bad ki skhim kiba dei ban pyntrei kin ïaid beit ïaid ryntih.