Thwet jur ki Pulit ïa 2 ngut ki briew ba suba khrai khlieh ïa u Rangbah

0

Shillong, Lber 10 : Ki Pulit ka jylla ki dang thwet jur ïa ar ngut ki briew kiba la suba jur ba ki dei kiba donkti ha ka ban pyniap dusmon ïa u Bah Omeka Myrthong da kaba khrai khlieh, khet ïa ka kti bad ban tep ïa ka met harud ka Pung Umiam.
Haba ïakren bad ki nongthoh khubor hynne ka sngi, u DIG (Eastern Range) u Davis N R Marak ula ïathuh ba ki la don ar ngut ki paralok jong u Bah Omeka kiba la don ryngkat lang bad u hynrei kine ki ar ngut haduh mynta ki la phet rieh.
U DIG ula pyntip ba ki pulit ki la rejistar case halor kane ka jinglap ïa ka metiap jong u Bah Omeka namar ka jingsuba jur ba une u rangbah ula shah pyniap.
Ha ka sngi Palei, la leh ïa ka Post-Mortem ha Umiam bad ha ka jingtohkit la shem ba la ujor sha ki pulit jong ka Lumdiengjri ha ka 3 tarik u Lber halor ka jingjah jong une u rangbah.
“Une u rangbah ula jah naduh ka 26 tarik u Rymphang hynrei la wan ujor sha ki pulit haka 3 tarik u Lber” la ïathuh u DIG.
Halor ka jingbuddien ïa katei ka jingujor, ki pulit jong ka Lumdiengjri PS ki la shem ba une u Bah Omeka ula don lang khatduh eh bad ki ar ngut ki paralok ïa kaba la suba ba ki la ia dih kyiad.
Une u heh pulit, ula ong, haba ïoh jingtip halor katei ka jingjia, la ujor da ka Zero FIR ha Umiam PS bad ïa kane ka Zero FIR lah ban ujor ha kano kano ka police station, wat lada ka jingjia kam dei satia kaba la jia hapoh u pud u sam jong katei ka police station.
Hadien ba la dep ujor ïa ka Zero FIR ha Umiam PS, la rah noh ïa kane ka case sha Lumdiengjri PS bad ka jingtohkit mynta ka dang ïaid shakhmat bad ka jingthwet ïa ki ar ngut kiba la phet rieh ka dang ïaid haduh mynta.
Kum ban shu kdew, haka 6 tarik u Lber, la lap ïa ka khlieh jong u Bah Omeka na ka pung Umiam bad tang hadien 2 sngi la lap sa ïa ka kti kaba la per ha katei ka pung bad ha kane ka juh hi ka sngi, la lap ïa ka met kaba sah jong u rangbah uba la shah pyniap na kawei ka jaka kaba don hajan ka pung Umiam.

Leave A Reply

Your email address will not be published.