Ngi don la ki mat treikam hynrei dang donkam ka jingïatreilang kum ka Liang Pyrshah: Mukul

SHillong, Lber 09: U Nongïalam ka TMC uba la bat ruh kum u Nongïalam ka Liang Pyrshah ha ka samoi ba la dep ka ïingdorbar u Dr Mukul Sangma ha ka sngi Palei u ong ba wat la ki lai tylli ki party kiba don ha ka liang Pyrshah ki don la ki jong ki mat treikam hynrei ka dei ka kamram jong ki pat ban ïatreilang kum ka Liang Pyrshah haba ïadei bad ki mat kiba ktah ïa u paidbah ka jylla.
Haba ïadei ba u Nongïalam ka Liang Pyrshah u Dr Mukul u ong ba kane ka mat ka shong ha u Lamphang ka Ïingdorbar ban shim ïa ki rai namar ki don ki kyndon kiba hap bad bud bad ki rukom kiba la ju leh ha ki snem kiba la dep.
U la ong ba ka don ka por ha kaba ki MLA ha ka Liang pyrshah kiba jop na kawei ka party ki don tang 7 ngut hynrei na ka liang u Lamphang ha kito ki por u la ai jingithuh ïa u Nongïalam ka Liang Pyrshah.
“Nga tharai baroh ngi kynmaw ba u Dr Donkupar Roy Ba la bam kwai ha Dwar u Blei ha u snem 2013 haduh u 2018, la thung ïa u kum u Nongïalam ka Liang Pyrshah wat la ka party jong u kam kynjoh ka jingdon ki MLA 10 ngut kumba dawa ki kyndonna ka liang jong ngi ha kato ka por ngi la thung ïa u kum u nongïalam ka Liang pyrshah bad nga ngeit ba ha kane ka kynti ruh kin leh da kajuh hi ka ruom,” ong u Dr Mukul haba ïadei bad ka jingïoh ka Liang Pyrshah ïa u nongïalam.
Haba ïadei bad ka rai jong ka VPP ban ym ïasnoh bad kiwei ki party ban thaw kynhun ha Liang Pyrshah, u Dr Mukul u ong, “Ngi don la ki mat treikam bad ngim mut ba tang shu thaw kynhun ngin klet noh la ki mat treikam jong ki party kiba ngi don hynrei ban treilang kum ka Liang Pyrshah ban kren ïa ka sur na bynta ka jingmyntoi u paidbah ka jylla kat kum ka iktiar ba u la pynkup katkum ka jingpynjop jong ki ïa ki kyrtong ba ngi sei”.
Shuh shuh u la ong ruh ba ka All India Trinamool Congress (AITC) bad ka and Indian National Congress (INC) kan bteng ban shong pyrkhat ha kaba ïadei bad kane ka mat.