Shillong, Lber, 10: U Rakkam A. Sangma uba la dang shu shah pynkhamti kum u Myntri uba peit ïa ka tnat Pule Puthi jong ka Sorkar Jylla ha ka sngi Thohdieng ha ka sien banyngkong eh u la lum ïa ki ophisar jong ka tnat Pule Puthi ban ïathir ïatai kumno ban pynbha bad ban pynjanai ïa kane ka tnat.
Ha ka jingïalang, u Myntri u la ïaiban ba ka long kaba donkam ban pynbha ïa ka tnat Pule Puthi lyngba ka jingthung ïa ki nonghikai ha ka kyrdan Elementary, ban bishar bad ban pule bniah ïa ka State Curriculum Framework (SCF) ha kaba ïadei bad ka National Curriculum Framework (NCF) shwa ban sa pyntreikam ïa ka New Education Policy 2020 bad kumjuh ruh ban buh hakhmat ïa ki jingsdang ba mynta jong ka Sorkar Jylla ha kaba pynbha ïa ki ing skul, ka jingpynbha ïa ka pule ka puthi lyngba ka Vidya Samiksha Kendra bad ban pynbei ryntih ïa ka rukom sam tulop sha ki nonghikai skul.
U Rakkam u la pyntip ruh ba ïa ka shithi jingkyrpad ban pyllait ïa ka Jylla Meghalaya na ka Central University Entrance Test (CUET) na ka bynta ki samla pule kiba angnud ban bteng ïa ka Under Graduate ha kane ka samoi ladep phah sha ka Ministry of Education lyngba ka ophis treikam jong u Myntri Rangbah ka Jylla.
Ha kajuh ka por, u la pyntip ba ïa ka shithi jingkyrpad na ka bynta ban pynjlan ïa ka tarik thep kyrteng ïa ka CUET haduh ka 31 tarik, Lber, 2023 na ka bynta ka jylla Meghalaya ladep phah sha ka ophis jong u Director General, NTA, New Delhi, da kaba pynpaw ruh ïa ki daw halor ka jingpynlong dang shen ïa ka elekshon sha ka Ïingdorbar Thawaiñ kaba la pynslem noh ban pynlong ïa ka State Board Examination ha kaba bun na ki khynnah skul kiba sah sha ki shnong nongkyndong ki la ïakynduh mawsiang ban pynrung kyrteng na ka bynta ka CUET.
U Myntri u la leit jngoh ruh ïa ka Directorate of Educational Research & Training (DERT) bad pynshlur ruh ïa ki nongtrei jong kane ka tnat ban trei minot khlem shongthait na ka bynta ban pynbha bad ban pynjanai ïa ka pule ka puthi ha kane ka jylla.
