Shillong, Naitung 06: Ka Meghalaya bad ka Philipines ki la ïamir jingmut halor ki lad ki lynti ban ïaphah markylliang ïa ki kaitor bad ki kynhun nongtem (musical exchange), ka ban ïarap pynpoi ïa ki kaitor bad nongput nongtem ba dang khie ka Jylla sha ki rynsan ka pyrthei.
U Myntri kam jngohkai Bah Paul Lyngdoh, ula ïakren ïa kane ka jingtyrwa bad u Harsh Kumar Jain, u Ambassador ka Ri India sha Ukraine uba sa leit noh kum u Ambassador sha ka ri Philipines.
Kawei na ki jingtyrwa ba la ïakren bha ha kane ka jingïakynduh ka long ban pynlong ïa ka prokram ïaphah markylliang ïa ki kaitor bad ki nongtem, ka ban ïarap ïa ki nongtem ba dang khie ka Meghalaya ba kin paw ha ka pyrthei, kaba la ai mynsiem da ka jingjop jong ka Meghalaya Grassroots Music Project (MGMP), kaba kyrshan ïa palat 3000 ngut ki nongput nongtem bad ki kaitor.
“Ka jingtyrwa kaba nga la ïakren bad u ka long ba kumno ngin leh, kum u Ambassador, un ïarap ban pynurlong ïa kane ka prokram ka ban pynlong man ka por hapdeng ka Philipine bad ka Meghalaya. Ngi la ïakren ruh halor ka kolshor bad kiwei kiwei,” ong u Bah Paul hadien ka jingïalang.
“Kawei na ki kam ba paw eh ka Philipines ka dei ha ka put ka tem bad ka arts. Kumba phi tip, ki Filipinos kila paw ha satlak ka pyrthei da ka sap ha ka put ka tem bad ka rwai ka siaw, bad ki la kiew ruh ha kiba bun ki rynsan ha kylleng ki sor ka Ri India bad ki Ri ka pyrthei,” la bynrap u Bah Paul.
U Bah Paul ula kren ruh halor ki lad ban ïatreilang ha ka kam jong ka koit ka khiah kynthup ïa ka jingplie kabu na ka bynta ki samla pule doktor bad nos na Meghalaya. Ula pynpaw ba u Ambassador ula kular ban sa nang wan ïuhkjat bha sha Meghalaya ban pynkhlaiñ ïa kane ka jingïadei.
Na ka liang u Harsh Kumar Jain ula ong, “Ka jingthmu jong ka jingwan jong nga sha Shillong ka long ban kyntiew ïa ka jingïadei hapdeng ka thaiñ Shatei Lam Mihngi ka Ri bad ka Ri Philipine, kaba ngan sa leit long Ambassador ha kine ki khyndiat taïew ban wan.”
“Kumba phi lah ban tip, ka Act East Policy jong ka Sorkar India ka thmu ban kyntiew ïa ka jingïadei hapdeng ka thaiñ Shatei Lam Mihngi ka Ri India bad ki Ri ka dewbah ASEAN,” u la ïathuh.
U Jain ula ai ka jingïaroh ïa ka kolshor, ka histori jong ka Meghalaya bad pynpaw ruh ïa ka jinglyngngoh halor ka jingitynnad ka sawdong sawkun jong ka Jylla. Ula kular ban ai jingkyrshan ïa ki samla pule na ka thaiñ kiba pule shabar ka Ri bad pynshlur ruh ïa ki ba kin pynïajan bad ka Embassy ha Manila.
