Shillong, Naitung 06: U Nongïalam ka UDP bad Myntri Sorkar Bah Paul Lyngdoh ula pynshai ïa la ka jong ka jingkren da kaba ong ba ka HSPDP kan nym pat weng satia ïa ka jingïatreilang na ka Regional Democratic Alliance (RDA) hynrei ka kwah ban ïakhun ïa ka elekshon MDC la ka jong ne marwei.
“Namar ïa kane ka kam ym pat shym la ai ktien satia sha ngi, ngin sa lah ban ïakren kham bha ïa kane ka kam ynda ka Alliance ka la ïakynduh,” ïathuh u Bah Paul.
Ha kajuh ka por ula ong, ka UDP bad ka HSPDP kin sa ïakynduh shen ban ïakren ïa ki kam ki jam kiba ïadei bad kane ka bynta.
Lah ban kdew ba une u Nongïalam ka UDP ula pyntip ba ka HSPDP kan sa mih noh na ka jingkyrshan ïa ka RDA.
Ym tang kane, ka jingïakren ka la ïaid ruh halor ka jingbym sngewhun jong ki katto katne ki nongïalam ka UDP ban dang ïadonlang ha ka Sorkar MDA, ïa kaba u Bah Paul ula pynshai ba ki don katto katne ki nongïalam ka UDP kiba sngew ïa kane hynrei kiba bun hi ki dang kyrshan ban ïadonlang ha ka MDA.
“Ka jingpynsngew jong kiba bun hi ka long ba ka elekshon 2023 ka dei ka rai jong u paidbah ba la ai sha ka MDA,” pynshai shuh shuh u Bah Paul.
