Shillong, Nailar : Ka All Meghalaya Primary School Teachers’ Association (AMPSTA) kan ïasnohkti lang ha ka jingïaid paidbah ne proseshon ba la tip kum ka “Bharath Yashtra’ ba la pynbeit da ka All India Primary Teachers’ Federation (AIPTF) ka ban long ha ka 4 tarik u Nailur 2023 halor kiba bun ki mat jingdawa.
Ka Seng ka la ong ba kane ka ka jingïaid paidbah kan sdang napoh Community Hall Golf Link bad ïaid lyngba ïa surok ïew Polo sha ka surok ha lyndet ka City Dhaba, sha MLA hostel bad mih sha State Bank of India lyngba ka ophis DC sha Nan Polok, Bivar Road bad phai biang sha ka jaka ba sdang ïa ka jingïalang.Kane ka jingïaid paidbah kan sdang naduh ka por 10 baje mynstep haduh ka 12:30 mynsngi.
Na ka laing ka Seng ha u kyrwoh lyngba u Bah FC Shullai General Secretary /APSTA bad u Secretary ka AIPTF ki la ong ba kane ka jingïaid paidbah ka long shibynta ban dawa na ka sorkar na ka bynta ban pynneh ha kaba ïadei bad ka pension skhim, ka jingithuh ne regularize ïa ka jingshakri jong ki nonghikai Lower Primary School, ka jingsiew ïa ka 4th Installment 25% Revised pay jong ki nonghikai Dificit, ka jingsiew tista ïa ka tulop jong ki nonghikai Deficit bad halor ka quality education.
Kumta na ka liang ka Seng ka kyntu ïa baroh ki nonghikai kiba la thung hadien jong ka 01.04.2010 ter ter bad ruh ki nonghikai deficit Lower Primary School Teachers ba kin wan ïashim bynta lang ha kane ka jingïaid paidbah.
Ha kane ka sngi yn shim da ka shuti paidbah ne ka mass casual leave da baroh ki nonghikai. Na ka liang ki nongkitkam na ka head office jong ka Seng ki kyrpad ïa baroh ki nonghikai ba kin ïa poi ha ka jaka ban sdang ïa ka jingïaid paidbah 15 minit shwa ka por ban sdang ka prokram.
