Shillong, Nailar, 31: U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ha ka sngi Palei u la kren da kaba shai ba ka District Council kan ym ithuh satia ïa kino kino ki Self Styled Rangbah Shnong kiba buhai shnong hapoh ka Refugee Rehabilitation Colony ïa kaba la tip mynta kum ka Them Rynjah.
Ka District Council ka la pynskhem ïa ka jingpynbna ba la pynmih da ka Ophis jong u Syiem ka Hima Mylliem naduh ka 1 tarik, Rymphang, 2019 ba ïa ka Refugee Rehabilitation Colony, Rynjah la jer kyrteng kum ka Them Rynjah ka ban long ruh kawei na ki dong kaba hap hapoh ka jingpeit jingkhmih jong ka Dorbar Shnong Rynjah.
“Naduh ka 1 tarik, Rymphang, 2019 lyngba u Acting Syiem jong ka Hima Mylliem Pa’iem Ainam Manik Syiem la pynmih ïa ka jingpynbna ïa u pud synshar jong ka shnong Rynjah. Haba ngi phai ïa u pud synshar, kane ka jingpynbna na ka Hima Mylliem, ïa ka Refugee Rehabilitation Colony la kynthup lang hapoh ka jingsynshar jong ka Dorbar Shnong Rynjah,” la ong u Bah Pynïaid ha ka jingïakren bad ki lad pathai khubor ha ka sngi Palei.
“Ka KHADC ruh ka la pynskhem ïa ka jingpynmih ïa ka jingpynbna da ka Hima Mylliem” la ong u Bah Pynïaid bad bynrap, “ïa ka Refugee Rehabilitation Colony la pynskhem ruh da ka kyrteng Them Rynjah.”
“Halor ka jingpynbna, la bthah ïa baroh ki nongshong shnong kiba sah ha Refugee Rehabilitation Colony, Rynjah lada ki donkam ïa kino kino ki syrnot, lada ka long ïa ka Labour License, Trading License, Residential Certificate bad kiwei kiwei ki syrnot ki dei ban shim na u Rangbah Shnong ka Rynjah. Ngi la ïohi ba bun kiba la leit sha ka dorbar Shnong Rynjah ki bym dei ki jaidbynriew Khasi kiba sah ha Refugee Rehabilitation Colony,” u la ong.
Ka Executive Committee jong ka Dorbar Shnong Rynjah ha kane ka sngi, ka la ïakynduh ruh ïa u Chief Executive Member ban pan jingpynshai halor ka jingpaw ha ki lad pathai khubor ba ki bar jylla ki ïoh ban leh ïa ka khaïi ka pateng ha Iew Rynjah da ka syrnot ba la ai da Society napoh ka Refugee Rehabilitation Colony ban pan ïa ka Trading License na ka KHADC.
“Ha jingkhynra jong kawei ka sengbhalang ha iew Rynjah ïa ki dukan bar jylla dang shen, la lap ba ki don ki shithi ba la soi naduh u snem 2007-2008. Nga ruh ngam pat ïohi ïa kata. Na ka liang jong ka Executive Committee ba mynta, ngi kwah ban pyntip sha baroh ki paidbah ba ka Refugee Rehabilitation Colony ka la hap hapoh ka Dorbar Shnong Rynjah. Nga kyntu ïa ki bym dei ki Khasi lane wat ïa ki Khasi ba kin bud ïa ka riti synshar shnong synshar thaw ba la pynkup hapoh ka United Khasi Jaiñtia Hills Appointment and Succession of Chief and Headmen Act, 1959. Kumjuh ruh hapoh ka Dorbar Shnong Rynjah kaba hap hapoh u pud u sam jong ka Hima Mylliem, ka Hima ka la don la ka jong ka Aiñ (Hima Mylliem Act, 2007). Hapoh kane ka Aiñ la kren shai u bym dei na ka jaidbynriew Khasi um lah ban kam ïalade kum u Self Styled Headmen ban ai syrnot bad ban leh ïa kane katai,” la pyntip u CEM.
“Ngim don jingithuh ïa ki briew kiba shnong ha kane ka dong Them Rynjah ba kin kam ba ki dei ki Rangbah Shnong. Ngi ithuh beit ïa ka Dorbar Shnong Rynjah, ïa u Rangbah Shnong, ïa ki Rangbah Dong Rynjah ba ka Dorbar Shnong ka la pynkupbor ïa ki,” la pynshai u CEM.
U la ïathuh ruh ha kaba ïadei bad ki jingai syrnot bad kiwei kiwei ki dulir, ka KHADC kan pynskhem ban shim tang ïa ki syrnot ba la ai da ka Dorbar Shnong Rynjah. “Ngin ym pdiang ïa kino ki jaid syrnot na ka liang jong ngi,” la pynskhem shuh shuh u CEM.
U la ong ruh ba kaba ïadei bad ka lehniam leh rukom jong ki jaidbynriew bym dei Khasi, ka KHADC kam don eiei ban tuklar katba ïa ka riti pynïaid shnong yn ym shah daleilei ruh em ban rejistar da ka Society hapoh ka Society Act.
Shuh shuh u la ïathuh ba ka Council haduh mynta kam pat ïohi ïa kino kino ki kot ki sla ba la ai da ka Society kum ka No Objection Certificate naduh u snem 2007-2008.
“Lada don kiba pynkheiñ ïa kane ka jingpynbna ba la pynmih da ka Hima Mylliem bad ba la pynskhem da ka District Council ngin pynshitom katkum ka aiñ,” la maham u CEM ka KHADC.
U Rangbah Shnong ka Rynjah u la ong, “hHalor ka Trading License ngi la ïakren bad ka District Council na ka por sha ka por bad baroh ki bar jylla kiba khaïi hapoh shnong kim lah ban ïaid lait khlem da ïoh ïa ka NoC na ka shnong bad ka jingbit na ka KHADC.”
Haba kylli, u la ong, “ngim tip haduh katno tylli ki bar ylla kiba la ïoh ïa ka Trading License hynrei haduh mynta mynne kiba rejistar ha ha Rynjah bad ha Them Rynjah ki don da ki spah tylli.”
Halor ka Society jong ka RR Colony, u Rangbah Shnong u la ong, “ïa ka jingtreikam jong ka Society ngim khang namarba ka dei ka Society kaba la rejistar bad kaba la rim bha. Ka Dorbar shnong Rynjah kam don jingkhang ïa ka jingtreikam jong ka Society hynrei ha kaba ïadei bad u pud u sam bad ka khaïi ka pateng baroh ki dei ban wan hapoh ka jingpeit jingkhmih jong ka Dorbar Shnong Rynjah. Lada ki treikam kum ka Society ngim don jingwit hynrei kaba donkam ka long ba kin hap pyntip sha ka Dorbar Shnong ïa kaei kaba ki hap ban ïaid.
