Jowai, Nohprah 12: Ka lympung ïalehkai jong ka kyrdan Super Division Football Tournament 2023 bala pynïaid da ka East Jaiñtia Hills District Football Association (EJHDFA) kala jam mynta sha ka jingïakhun Final ka ban long haka 15 tarik mynta u bnai hapdeng ka Sutnga SSCC pyrshah ïaka Rymbai Shkenshynriah SC ha madan Deiñchynrum haka por 1 baje nohphai sngi.
Haba phai sha ka jingïakhun mynta ka sngi jong ka Qualifier 2 na ka liang ka kynhun jong ka R.Shkenshynriah SC kala pynliem da 2-1 kol ïa ka R.Iawpynsing SC, ïa ka kol na ka R.Shkenshynriah SC la thep da u Hikaidame Bareh haka minit ba 5 bad u Roiboklang Bareh haka minit ba 96. Katba na ka liang ka R.Iawpynsing SC la thep da u Hesmiki Rymbai haka minit ba 90+2.
Lyngba kane ka jingjop jong ka Rymbai Shkenshynriah SC kala ïoh ban rung syndon sha ka jingïakhun phainal jong kane ka lyngpung da kaba yn ïakhun pyrshah ïa ka Sutnga SSCC ban ïoh rah ïa ka nam lahduh mynta u snem.
Ha kane ka phainal u myntri ka sorkar jylla ma Kyrmen Shylla un long kum u kongsan ha ryngkat ka jingdon lang u bah Hamlet Dohling President MFA kum u synbud kongsan, nalor ki ki nongkitkam ka EJHDFA.
