Pyninam ka Seng Kynthei Katholik Nongpoh iaki jingbam tynrai ban pynmih pisa ïa ka kam U Trai

Nongpoh, Nohprah 12: Ka Seng Kynthei jong ka Balang Katholik Nongpoh Parish mynta ka sngi kala pynlong da ka Food Fest Cum Jumbo Sale ban pyninam ïaki jait jingbam tynrai bala shet haki rukom bapher bapher naka bynta ban pynmih pisa haka kam u Trai shuwa ka jingpynkhreh ruh ïaka khristmas bad ka jingwan longbriew jong u khyllung Jisu sha kane ka sla pyrthei bala wan ruh ban shim bynta da ki riewngeit naki balang shnong jong ki Sub District bapher bapher bad ka parish hi baroh kawei.
Ïa katei ka ïew pyninam ïaki jait jingbam tynrai, ki jhur jhep bad kiwei kiwei ki mar rep la pynlong ha madan jong ka St. Pauls Higher Secondary School, ha kaba ki paidbah na kylleng ki jaka kila tuid ban leit thied ïaki jhur ki jhep, ki jaiñ ki nep na katei ka ïew pyninam ban mad ruh ïaki jingbam tynrai bala shet haki tyndong siej bad kiwei kiwei ki rukom shet tynrai.
Naka liang ka kong Meristela Lamare President jong ka Seng Kynthei Balang Katholik Nongpoh Parish kala pyntip ba kane ka dei ka sien kaba san ba ka seng Kynthei Katholik jong ka Nongpoh Parish ki pynlong kum katei ka jait prokram da ka jingsnoh ktilang ki Balang Shnong naki Sub District ha kaba kum ki longkmie ki wan ban die ïaki mar ki mata jong ki naduh ki jhur ki jhep, ki soh ki pai, ki jingbam tynrai, ki jaiñ ki nep bad kiwei kiwei da ka jingthmu ban pynmih pisa naka bynta ban pyntyllun ïaki kam shakri ha u Trai bad ki kam ba kynja mynsiem.