Pynkup burom ka HYC Tyrsad Circle ïa ki samla pule kiba wan shakhmat ha ka SSLC bad HSSLC

Tyrsad, Nohprah 12: Ka Hynñiewtrep Youth Council (HYC) Tyrsad Circle kum shibynta ban pynshlur bad ban kyntiew ïa ki khynnah skul bad ki skul kiba don ha ka thaiñ, ka la pynlong ïa ka jingpynkup burom ïa ki samla pule kiba wan shakhmat ha ka SSLC bad HSSLC kiba pule ha ki Secondary bad Higher Secondary School kiba don ha ka thaiñ bad ka jingai khusnam kyrpang ïa i Jubansuk Hynñiewta iba wan shakhmat duh ha ka B.Sc (Mathematics) ha ïingdorbar ka shnong Mawlum Tyrsad.
Ha ka jingkren jong u bah Enlang Sawian, Education Secretary ka HYC Central Body kum u kongsan u la ban jur ba ki samla pule ka jaidbynriew ki dei ban don ka mynsiem ïa khun ne competitive spirit namar ka mynsiem ïa khun ka duna palat ha ki samla pule ka jaidbynriew. U la pynpaw ruh ba ki samla pule kim dei ban khmih lynti than tang ïa ki kam sorkar hynrei ban phaikhmat ruh sha ki kam kompeni bapher bapher kiba ka jingsiew ka kham heh ban ïa ki kam sorkar ruh.
U bah Staising Kharbteng ha ka jingkren jong u, u la kyntu ïa ki khun samla ba ki dei ban don ka jingthrang ha ka jingim jong ki khnang ba kin nang ban pynkhreh ban ïoh kheit ïa u soh ka jingjop bad ban kiar ïa ki diengpyngkiang kiba lah ban ktah ïa ka lawei baphyrnai jong ki.
La ïoh ruh ïa ka jingkren na u bah Shanlang Khongsit u Rangbah Kur ka Kur Khongsit.
La ïadon ryngkat ha kane ka sngi u bah Shanlang Marweiñ u dkhot CEC, kong Banisha Nongsiej dkhot HYC Women’s Wing, bah Bhaboklang Sohshang President ka HYC Tyrsat Circle, ki dkhot ka seng, ki kmie ki kpa bad kiwei kiwei.
La pynshitrhem ruh ïa kane ka jingpynkup burom lyngba ka jingrwai na u samla Vicky Kharshiing bad la sam ïa ki Momento bad kiwei kiwei ki jingai sngewbha da u kongsan bad kiwei kiwei kiba ïadon ryngkat ha kane ka sngi.
Ïa ka jingïalang da u bah Phrangsngi Rangslang, General Secretary ka HYC Tyrsat Circle bad ka jingkren ai khublei na u samla Bansharai Sawkmie, Assistant General Secretary jong ka HYC Tyrsad Circle.