Khliehriat, Nohprah 12: Kumba ju long man la u snem, mynta ka kynti ruh, ka Dorbar Shnong jong ka shnong Moolamylliang, East Jaiñtia Hills District, kan pynthaba ïa ki ding krismas ha baroh kawei ka shnong ha kaba u MP jong ka Jajya Sabha, u bah W.R. Kharlukhi, un wan ban long kum u kongsan u ban pyllait bad plie ïa ki jingthaba ding ha ka 18 tarik mynta u bnai Nohprah 2023 bad ka MLA jong ka Sutnga Saipung Constituency, ka kong Santa Mary Shylla kum ka Symbud kongsan.
La ong ba kane ka jingpynthaba ding Kristmas, kaba yn pynthaba ha ki rong bapher bapher ha baroh kawei ka shnong ka long ban pdiang sngewbha ïa ka aiom lehkmen krismas bad kane ka jingpynthaba ding kan sdang naduh katei ka sngi jong ka 18 tarik man la ka miet naduh ka por 5 baje janmiet haduh ka por 12 baje mynmiet bad yn pynkut ïa kane ka tamasa pynthaba ding ha ka 3 traik u kyllalyngkot 2024.
Na ka liang ka Dorbar Shnong ka pynbna ruh ba kan don ka Christmas concert ha ka janmiet jong ka 22 tarik u nohprah ha kaba ka kynhun tem “TAKEN ABACK” kaba na Mawngap, East Khasi Hills District bad ka kynhun “THE LYNX” kaba na West Jaiñtia hills District Jowai kin wan ban pynsawa ïa ki sur jingrwai krismas.
Ha ka janmiet jong ka 23 tarik nohprah pat ka kynhun tem jong u bah Eladmitre Dkhar bad u DJ Wanshan, kin pynsawa ïa ki sur jingtem ha katei ka shnong.
Kum ka jingpashat jingtip, ka shnong Moolamylliang, East Jaiñtia Hills District ka jngai 112 kilo mitar na ka nongbah Shillong bad 15 kilo mitar na ka District headquarter, Khliehriat.
Ka Dorbar Shnong ka la pynkhreh ruh ïa ki jaka sah miet na ka bynta kito kiba kwah ban sah miet, kata ha Guest House, Khliehriat, phone number, 9366455744, East Side Inn, phone number 9089390888, Mon Maya Guest House, phone number -8132002479 bad ha Wika Guest House, phone number – 6009538618.
Na ka bynta kito kiba wan thymmai ha kane ka shnong, ki lah ban pyndonkam da ka google map “Moolamylliang Presbyterian Church” lane ban scan ïa u OR Code.
Na ka bynta kito kiba wan ha ka por myn sngi, ka don ki dukan ba die jingbam hajan shnong ba la pynkhreh da ka Tista Hotel Khliehriat.
Ka Dorbar Shnong, Moolamylliang ka khot, iawer bad pdiang sngewbha kiba wan hapoh shnong ba kin sakhi da la ki jong ki khmat ïa ka jingphuh jingphieng jong kane ka tamasa pynthaba ding Kristmas.
