Nongstoiñ, Lber 17: Sa tang ar snem eiei ka West Khasi Hills kan sa jam ïa u mawmer ba sanphew jong ka jingïaid lynti naduh ba la ïoh ïa ka, hynrei ki dang bun bah ki jingduna lada peit kata naduh ki lynti syngkieng, ka pule puthi, ka koit ka khiah, ka kamai ka kajih, ka bording, ka umbam umdih bad habaroh ki liang.
Haba phai sha kane ka phang ka long kaba sngew lehraiñ ban ong ba ka West Khasi Hills ka la jan dap san phew snem. Kumta ha kaba ïadei bad ka jing bym pat biang jong ka district ha baroh ki liang, ki nongïalam ka Bharatya Janata Party ha ka sngi thohdieng ba la dep, ki la hiar sha Langpih kaba hap ha Rambrai Jyrngam constituency kaba dei kawei na ki constituency kiba dang duna palat ka roi ka par, ban pynshai sha ki nongsynshar shnong kaei kaba ki dei ban leh shuwa ba ka sorkar kan pynlong ïa ka jingrakhe ïa ka Jubili rupa jong ka jingdap sanphew snem jong ka District.
Ha ka jingïalang kaba la pynlong ha Langpih Government L.P skul kaba la pynïaid da u bah Spastarlin Nongrem u ba dei u nongïalam ba hakhmat jong ka BJP West Khasi Hills, la ïadon ryngkat da u bah David Kharsati National Council Member ka BJP, u bah Mewanker Lyngdoh State president jong ka BJP Youth wing, u ba dei ruh u nongsaid aiñ, u Dr. Evrist Myrsing secretary ka Meghalaya BJP Youth wing Meghalaya state unit bah Diostarness Jyndiang MLA barim ka Nongstoiñ ryngkat kiwei kiwei ki dkhot ba paw khmat jong ka BJP bad palat sanphew ngut ki riew rangbah na ki shnong khappud ba kynthup naduh ki shnong Khasi bad ki shnong Garo.
Ha katei ka sngi la ïoh ïa ka jingpynshai na u Dr. Evrist Myrsing ha kaba ïadei bad ki jingeh ba ki paitbah nongshong shnong kiba shong ha khappud ki ïakynduh na ka por sha ka por.
U bah Myrsing haba pynshai halor katei ka phang, u la ong ba kum uwei na ki nongshong shnong ha Block II, kaba dei ka jaka khappud kaba ki jingïakajia bad ka Assam ki mih na ka por sha ka por, u sngewthuh shai ïa ki jingeh ba ki paitbah nongshong shnong ha ka thaiñ Langpih ki ïakynduh, hynrei wat la ki ïakynduh jingeh man ka por ruh ki dei ban sngewthuh ba ka shong suk shong saiñ para nongshong shnong ka dei kaba donkam eh.
U la ong ruh ba ki briew jong ka Assam ki dei ki nong India ki briew jong ka Meghalaya ruh ki dei ki nong India kumta ban thaw ïa ki jingïaklumar para nong India kam long kaba bha. Ha kajuh ka por u la ong ba ki pulit kiba don ha khappud ruh kim don hok ban ïashah shilliang ïano ïano, namar ka jingshah shilliang ka dei ka daw bah kaba wan rah ïa ka huri hura ha ki shnong khappud.
U bah Mewanker Lyngdoh haba pynshai lyngkot ha katei ka sngi u la ong ba kum u nongsaid aiñ u sngewthuh ba ki jingbym ïasngewthuh para nongshong shnong ki don ha kylleng ki jaka. Hynrei haba ki jingbym ïasngewthuh jingmut ki jia, kim dei pat ban poi haduh u pud jong ka jingïaklumar namar ka long kaba beaiñ.
U la pynshai ruh ba lada ki don kino kino ki jingïaklumar kum ki nongshong shnong, kim bit da lei lei ban shim ïa ka aiñ ha la ka kti, hynrei ki dei ban pynkloi ban pan jingïarap na ki bor ka aiñ.
U bah David Kharsati haba ai jingkren ha katei ka sngi u la ong ba kum u Dkhot jong ka National Council jong ka BJP, u tip ba ki paitbah katei ka thaiñ ki la angnud haduh katta katta ban pynbeit noh ïa u pud u sam. Ki ju pynsngew na ka por sha ka por sha u Conrad Kongal Sangma Myntri Rangbah ka jylla bad sha u Himanta Biswa Sarma Myntri Rangbah ka Assam, ba kin pynkut noh ïa ki jingeh ha khappud bad ban pynbeit noh da u pud u sam ba thikna. Hynrei lada ki Myntri ka Sorkar pdeng kim mon ki Myntri Rangbah jong ki ar jylla kim lah satia ban pynurlong lada dawa katno katno ruh.
U la ong ruh ba lada ki paitbah ki kwah ban pynbeit noh ïa u pud u sam kin phah da ki jingthoh sha u Myntri kam pohïing ka ri bad ma u kum u dkhot ka National Council jong ka BJP, u ba ju don lynter ha Delhi bad u ba ju ïakren ïa ki kam bad u Myntri kam pohïing ka ri na ka por sha ka por, un pynsngew lyngba kitei ki jingthoh khnang ba ka sorkar pdeng kan shim khia bad kan leh ïa kaba donkam.
Ha ka jingïalang la jied ïa u bah Spastarlin Nongrem kum u Convener jong ka Committee ka ban buddien ïa ka roi ka par hapoh West Khasi Hills, nangta saw ngut kiwei pat ki ban long kum ki co-convener.
