Nongstoiñ, Lber 17: U Deputy Commissioner jong ka West Khasi Hills District Bah Garod L.S.N Dykes, ha ka sngi saitjaiñ, u la pynlong ïa ka jingïalang kaba kyrpang bad ki seng saiñ pyrthei kiba pher bapher kiba dei napoh ka distrik, ban pyntip sha ki shaphang ka jingpyntreikam ïa ka Model Code of Conduct da ka Election Commission of India, na ka bynta ka jingjied nongmih-khmat sha ka Lok Sabha, 2024.
Kane ka jingïalang ka long kum ka jingbthah bad pynkynmaw ïa baroh ki seng saiñ pyrthei, ba kim dei satia ban pynkheiñ ïa ki kyndon jong ka Model Code of Conduct, khnang ban ïoh ka election kaba khuid kaba suba, khlem kino kino ki jingpynthut hapoh ka distrik. U la pynkynmaw ba ha ka election MP 2019, ka West Khasi Hills, District ka dei ka districk kaba duna bha ha ka jingwan jong ki nongthep vote bad ka long tang 64.4%. Kumta, u la kyntu jur ïa baroh ki nongthep vote ba ki dei ban don ka jingkitkhlieh bad ban pyndonkam hok ïa ka hok thep vote jong ki.
Kino kino kiba kwah ban ïoh jingbit na ka bynta ban pynlong ïa ki jingïalang paidbah, ki rally lane kino kino kam kiba ïadei bad ka election, ki hap ban da pan jingbit bad apply online lyngba ka Suvidha App. Lada kwah ban ujor ei ei lane lada don kiba pynkheiñ kyndon ki lah ban ujor lyngba ka cVIGIL App.
La pyntreikam ïa u control room number 03654280152 lada don kiba kwah jingtip kiba ïadei bad ka election, kumjuh ruh ïa u toll-free helpline number 1950 la dep ban pyntreikam, khnang ba ki paidbah ki lah ban ujor ïa kino kino ki jingujor kiba ïadei bad ka elekshon.
