Nongstoiñ, Lber 17: Khnang ban ïoh ïa ka election Lok Sabha 2024, kaba khuid kaba suba khlem kano kano ka jingpynthut bad ban pyntreikam ïa ki aiñ hapoh ki kyndon jong ka 144 Cr.P.C, u District Magistrate Eastern West Khasi Hills, District Bah G. Kharmawphlang IAS, katkum ka Model code of Conduct, u la pynmih ïa ka hukum ba la khang pyrshah pynlong ïa kino kino ki jingïalang, ki jingïaïaid paidbah, khlem da ïoh jingbit.
Ym shah ban buh ïa kino kino ki jingthoh, ne ban wah ïa kino kino ki jingthoh kiba long kum shi bynta jong ka jingïalap elekshon ha ki jaka Sorkar ne kino kino ki jaka paidbah. Ym shah ban pyndonkam ïa ki kali sorkar ne ki Ïing Sorkar na ka bynta ki kam election, ban pynlong ïa ki jaka mane blei kum ki jaka ïalap elekshon.
Ym shah pyndonkam ïa ki tynhung pynsawa shuwa ka 6 baje mynstep bad hadien ka por 11 baje mynmiet. Ym shah ban rah ne thep pisa ha pla palat ïa ka 50,000/-. Ym shah ban wah banner, placard, hoarding, lane kino kino ki jingthoh kiba ïadei bad kam ïalap elekshon ha ki ïing jong ki briew, ki jingtei ïing, ki jaka paitbah bad kiwei kiwei, khlem da ïoh jingbit shuwa na kit rai. Ym bit ban pyndonkam da ki kali kiba khlem ïoh jingbit ha ka por ba pynlong jingïalang ne jingïaid paidbah.
Ym shah ban thoh ïa ki poster, ki kot lyngkdop, ki banner ki lama bad kiwei kiwei khlem da ïoh jingbit. La khang ban ïalap elekshon hapoh 100 meter na ki Polling station. Ym bit ban pyndonkam ïa ki ktien khlem akor ha ka por ba ïalap elekshon paidbah ne jingïaid paidbah. La khang pyndonkam ïa ki lad pathai khubor, la ki dei ki kot khubor, ne lyngba ki tv, radio, mobile, ki SMS, kum ki lad ban ïalap elekshon khlem da ïoh shuwa ïa ka jingbit.
La khang pyrshah ïa ka jingrah suloi ha ki jaka paidbah haduh ban da kut ka elekshon bad la bthah ïa baroh ki briew kiba don ïa ki suloi license kiba dei napoh Eastern West Khasi Hills, District ba kin wan pyndem bad wan buh noh mardor ïa ki suloi jong ki ha ki Police Station kiba hajan eh jong ki.
Hynrei kane ka hukum kan ym treikam ïa ki pulit/ki shipai bad ki nongïalehkai sport kiba dei ki dkhot jong ka National Rifle, Association bad kito ki briew kiba don bynta ban ïada ïa ka suk ka saiñ, la ki dei kiba lah registar da ki Security Agency lane da ki Bank. Kane ka hukum kan treikam noh mardor.
