Mawkyrwat, Lber, 17: U Bah T. Lyngwa, District Magistrate, South West Khasi Hills District, hadien ba ka Election Commission jong ka Ri India ka la pynbna ha ka 16 tarik u Lber, 2024 kaba ïa dei bad ka General Election sha ka Lok Sabha, 2024 bad ba ka sngi thep vote ha ka Jylla Meghalaya kandei ha ka 19 tarik bnai Ïaïong, 2024.
U District Magistrate u la pynjari ïa ka Section 144 CrPC ha South West Khasi Hills District ha kaba la khang bad mana na kaba rah ïa ki suloi bad ki tiar pynmynsaw kynthup ka jingpynmih huri hura da uno uno u nongshong shnong kaba lah ban pynthud ïa ka jingïaid-beit ïaid-ryntih jong ka elekshon ha South West Khasi Hills District.
Kumta, ka long kaba donkam ban don ka jing-shongsuk shong-shngaiñ ha baroh kawei ka South West Khasi Hills District bad ka jingrah ïa ki suloi bad kiwei kiwei ki tiar pynmynsaw da ki katto katne ki nongshong shnong jong ka distrik ka lah ban wanrah ka jingthaw kulmar, shong syier bad kiwei kaba lah ban pynduh ïa ka hok jong ki nongshong shnong ban leit ïashimbynta ha ka jingïathep vote.
Namarkata, u la wer ïa ki nongshong shnong kiba don ïa ki license suloi ban leit buh noh mar mar ïa ki tiar jong ki ha kano kano ka Police Station kaba don hajan hapoh 10 sngi naduh ba pynmih ïa kane ka hukum.
Kinokino ki bym leh kumba la bthah, yn kheiñ ne ñiew beaiñ bad yn shim ruh kum ka dak ban khanglad ïa ki nongtrei sorkar na kaba pyndep ïa ki kamram jong ki kaba long ruh ka jingshah pynshitom katkum ka aiñ.
Kane ka hukum kan treikam mardor tad haduh ban da pynbna da kumwei pat.
