Mana u DC ka East Jaiñtia Hills ïa ki paidbah ban rah pisa palat 50 hajar shaneng

Khliehriat, Lber, 17: Ka Election Commission of India (ECI), ka pynbna ba ka ka General Election ban jied ïa ki nongmihkhmat sha ka Lok Sabha 2024 yn pynlong ha ka 19tarik u ïaiong 2024 bad ka mynta la pyntreikam ïa ka Model Code of Conduct hapoh ka District hi baroh kawei bad kumjuh ruh ïa ki kyndon 144 CrPC.
La ong ruh ba ka tnat Election Commission kan peitngor ba baroh kin iaid beit iaid ryntih bad ki nong thep vote kin thep ïa ki vote jong ki khlem kano kano ka jingartatien bad khlem kano kano ka jingsheptieng.
Ha kajuh ka por ka tnat kan peit ngor ruh ïa kino kino ki briew kiba rah ïa ka song pisa ban thied lane ban pynbor ïa ki nong thep vote bad ruh la mana ban pynlong ïa kano kano ka prokram iakhih hapoh ka district bad hukum ruh ban ym dei ban don kano kano ka jingiakajia hapdeng ki paidbah kaba ktah ïa ka shongsuk shong saiñ hapoh ka district.
Ki bor synshar district ki la pynjari da ka Section 144 CrPC ba mana ban rah pisa 50000 hajar shaneng, la mana ban pynlong jingïalang paidbah ne jingïakhih paidbah hapoh ka district bad kane ka hukum kan treikam tat haduh ban da pynbna da kumwei pat.
La hukum ruh ïa baroh kito kiba don ia ki suloi ba ki dei ban pynppoi noh ïa ki sha ki Police Station, Outposts bad Beat Houses kiba don hajan kaba long katkum ka aiñ Arms Act, 1959.
La mana ba ym bit ban thoh kino kino ki jingthoh ha ki kynroh, kum ki posterr bad kiwein kiwei bad ruh ban pynieng kino kino ki banners, ki lama hapoh ki phyllaw jong ki ophis sorkar, ïa ki banners lane ki lama lah ban buh tang ha ki jaka jong ki briew shimet da kaba ioh jingbit ba ki trai jaka bad ki banare ne ki lama kim dei pat ban wanrah kano kano ka jingklumar ïa kiwei.
Lada wah ïa ki lama ha ki kali kim dei ban wanrah ïa kano kano ka jingbym sngewtynnad kaba long katkum ki aiñ ne ki kyndon jong ka Motor Vehicles Act.
La mana ban buh ïa kino kino ki banaer lane ki lama ha ki kali kamai laitnoh sa tang lada ka kali ka dei kaba pyndonkam na ka bynta ka elaction bad dei ruh ban da ioh jingbit na ka ophis jong u District Election Officer/Returning Officer.
Kane ka kyndon aiñ 144 CrPC jong ka Code of Criminal Procedure 1973 ka mana ruh ban arrah ïa ki tiar pynmynsaw ne ki tiar pynbthei ki ban ktah ïa ka shongsuk shong saiñ hapoh ka district.