Nongpoh, Lber 17: U District Magistrate ka Ri Bhoi, u Arpit Upadhyaya hadien ba ka election commission ka ri India ka la dep ban pynban ïa ka tarik jong ka jingjied nongmihkhmat sha ka ïingdorbar thaw aiñ ha Lok sabha ba la pynbeit ban long ha ka 19 tarik u Ïaiong 2024 bad tang hadien ba la pynbna ïa katei ka tarik election MP sha Lok Sabha u District Magistrate u la pynbna paidbah ruh ba ka Model Code of Conduct ka la treikam ha baroh ki bynta jong ka Ri Bhoi District.
Kumba la pynkup bor katkum ka Section 144 CrPC, u District Magistrate u la pynmih ïa ki hukum ban khang pyrshah na ka bynta ki jingtoh kiba ïa dei ba ka election kum kaba thoh dak ha ki kynroh, ban tah poster, ki banner ki lama ha ki jaka sorkar ne ki jaka paidbah.
La khang pyrshah ruh ban ban wah lama ne banner ha ki jaka ki riew shimet khlem da ioh bor na ki trai jaka, ka jingtah sticker ne lama ha ki kali paidbah ne ki kali kamai kam dei ban ktah ïa ka leit ka wann ki paidbah bad na ka bynta ki kalai kamai paidbah la shah ban wah lama ne ki sticker tang lada ki la ioh bor na u District Election Officer ne ki Returning Officer.
Kane ka kyndon aiñ ka la khang pyrshah ruh ban rah ïa ki tiar siat ne ki kynja tiar ba pynbthei katba ym pat kut kane ka election ban jied ïa ki MP sha ka ing dorbar thaw aiñ ha Lok Sabha bad la shah ban rah ïa ki tiar siat la ki dei ki pistor ne ki suloi tnag ïa ki Police, Home guard, ki nongtrei ka tnad forest, BSF, CMPF bad kito kiba don License ki dei ruh ban leit buh sha ki Police Station ba don hajan ki jaka sah jong ki.
Kane ka kyndon ka khang pyrshha ruh ban pynlong ïa ka jingïalang election khlem da ioh jingbit n aka ophis u District Election Officer ne na ki Rangbah Shnong bad la shah ruh ban pyndonkam ïa ki tiar jingpynsawa (PA System) tang hapoh ka 10 baje mynmiet bad kino kino kiba pyndonkam palat ïa kane ka por kin shah ngat ha katei ka kyndon ba la dep ban pynjari.
La pyntip ruh ba kane ka kyndon aiñ ka la treikam mardor tang mar ïa dep pynban ka ECI ïa ka tarik jong ka election ban jied ïa ki MP sha ka ing Dorbar sha Lok Sabha bad kan treikam ruh katba ym pat pynbna da kumwei pat.
