H a kane ka juk ba mynta la ïohi ba kiba bun ki khun ki kti kim don por shuh ban peit bad sumar hok ïa la ki kmie ki kpa kiba la pun la kha, la ri bad sumar bad pynheh pynsan ïa ki bad lehse ka MERCY HOME kadei kawei pat ka jaka kaba kyrpang tam ba kin pynlut ïa ka por ka jinglong tymmen jong ki da ka jingbym banse. Shi kyntien lah ban ong ruh ba ka jingdon jong kum kitei ki jaka ri ïa ki tymmen ki kro ba la pynïaid da ki Sister of Charity, ka long pat ka jingkyrmen na ka bynta kiba bun ki meiieit pa ieit kiba la duh noh ïa ka jingkyrmen ha ka jingim.
Ïa ka jingtreikam bad ka jingshakri jong ka Mercy Home la tip kylleng kibynta jong ka jylla bad wat shabar ka jylla ruh khamtam eh ha kum ki bnai Kristmas bad Snem Thymmai namar bun ki kynhun kynthup naduh na ki Balang haduh ki sengbhalang kiba leit ban pynlut por shisien ha ka shisnem bad kitei ki paieit mei ieit.
Hynrei, katba kiba rung ban leit jngoh ïa katei ka jaka sah kyrpang ki mih ym da ka mynsiem kaba sngewhun hynrei da ka jingkhia ka dohnud, khamtam eh haba ki ïoh sngew da la ki jong ki shkor bad ïohi da la ki jong ki khmat na kitei ki meiieit paieit ba dei ki khun kiba ki la pynheh pynsan bad pynnang pynstad kiba wan buh ïa ki hangtei namarba ki la bunkam palat ban beh ïa ka spah pyrthei bad ba kim don por shuh ban peit ïa ki.
Tangba ym baroh ki long kumta, don pat napdeng jong ki kiba long marwei, kiba ym don khun ne ym don shuh kiba haïing hasem kiba ïa jan kiban peit ban sumar ïa ki. Kumta, kum ïa kitei, na ka liang ka Balang ne ki bor pynïaid shnong ki ju wan ban aiti noh ha ki nongpynïaid jong ka Mercy Home ban pynpeit ban sumar lem ïa ki.
Ban sngewthuh khambha, wat ki khun trai ki dang shem jingeh ban peit ïa ka kmie ne kpa lajong, katno tam kan dei ïa ki sister kiba hap ban peit da ki phew ngut kiba kum kitei. Kam dei satia ka kam kaba suk ban pynbit pynbiang ïa ki man ka sngi la ka long naduh ka bam ka dih, ka kup ka sem, ka koit ka khiah bad khamtam eh haba ki shem jingeh wat ban leit painkhana.
Katno ngut napdeng kiba pule ïa kane ka jingthoh kiba sngew sarong bad ong ba long katba long ngan ri ngan sumar hi ïa i mei i pa ha ka jinglong tymmen. Hato don seh ki khun kiba kheinkor ïa kiwei pat ban ïa la ka kmie bad u kpa. U Blei u ai ïangi tang iwei i mei bad iwei i pa bad da lei lei ngim lah lano lano ruh ban khot mei khot pa ïa kiwei pat ki briew. Ki shiphew hukum ruh ki kdew shai ba kum ki khun ki dei ban shim ïa ka jingkitkhlieh ban burom ïa la u kpa bad ka Kmie.
Kaba kham i lung mynsiem lada don napdeng jong phi kiba leit ban jngoh ïa kitei ki meiieit paieit kadei eh ba phin ïohi markhmat ba ki bapli ki ap khmih lynti ba iwei na kito kiba wan jngoh in dei i khun ne ki bahaïing hasem jong ki. Hynrei bunsien katei ka jingap khmih lynti jong ki ka shim por da ki snem ki snem ba kan urlong.
Watla ki ïoh ïa ka jingieid bad ka jingshakri kaba paka tam eh palat ban ïa kaba ki khun ki lah ban leh hynrei ki sliang hir hir ban ïoh mad ïa ka jingieid jong ki khun. Bad phin lap ruh ba don kiba ong, pynphone lem seh ïa u/ka khun jongnga nga kwah tip lano kin wan peit ïanga.
Ka Mercy Home naduh ba la seng ïa ka ha u snem 1973 ka la kylla long ka ïingbasa jong bun ki tymmen ki kro kiba ha ka jingnoh ka rta ki hap ban pynlut ïa ka jingim jong ki hangtei bad ki para tymmen.
Watla ki khun trai kim ïohi patiaw shuh ia la ki kmie ki kpa, hynrei katno i pangmet bad lung ka mynsiem ban peit ba watla ka sniehdoh ka la ringsti, ki kti ki kjat ki la kyiuh bad kim skhem shuh ban ieng hynrei ki shah knieh kynthet ïa ka jingieid jong ki khun. Bun ki hap ban pynlut ïa ka por jong ki katto katne snem ha Mercy Home ha shwa ba kin khlad noh na kane ka sla pyrthei.
Ki ummat kuratia bad ki jingïam paitdohnud ha ka sngi khatduh jong i mei i pa jong phi kin long pynban ki jingshah kynshi kyneh ha ka pyrthei lada phim lah ban peit bad sumar ïa la ki kmie ki kpa ha ka jinglong tymmen jong ki.
Lehse kan poi ka por ba ka kyntien tymmen kaba ong, Ka nongkylliang kaba kham sniew ka ap ïa kaba snoh ha piew’, kan sa kylla long pynban ka raibi ha kum kitei khun kiba sngew kumba ki wan hi sha kane ka pyrthei khlem ki kmie ki kpa.
