Nongstoiñ, Lber 17 : Ka West Khasi Hills District Boxing Association ka kitbok ïa ar ngut ki thei ïa kura na West Khasi Hills, i hep rit Isawanda Nongsiej na ka shnong Tiehsaw Nongstoiñ (35-37 kg) in mihkhmat ban ïa shim bynta sha ka 3rd sub juniors boy’s & girls National Boxing Championship ka ban long ha Noida, UP mynta u bnai.
Na ka liang ka seng ka kitbok ïa i ne i heprit ban ïalehkai bha ban wanrah burom ïa ka thaiñ bad ïa ka jylla hi baroh kawei. Ha kajuh ka por ka WKHBA ka ai ka jingkit bok kit rwiang ïa i thei ïa kura na Upper New Nongstoiñ West Khasi Hills District i Veronica Sohshang (45-46 kg), i ban leit mih khmat na ka jylla sha ka 3rd North East Olympic Game ka ban long mynta hi u bnai ha Nagaland.
Ka synuk ka kyrmen ba baroh ar ngut ki thei ïa kura na West Khasi Hills, kin ïa lehkai bha ha kitei ki rynsan kiba heh jong ka ri bad jong ka shatei ka thaiñ lam mihngi hi baroh kawei ong u samla Despitol Sun President WKHBA.
Ka seng ka sngew dei ban ai khublei ïa ka Meghalaya Boxing Association, halor ka jinglah jong ka ban kyntiew ïa ki thei bad ki rang ïa kura ka jylla lyngba kiba bun ki jingïakop ïa kura, kata lada dei ha ka jylla lane ha ki rynsan ïa kop ïa kura ba heh duh jong ka Ri India.
