U Bah Metbah Lyngdoh, President jong ka seng UDP, ula kyntait war ïa ka khubor jong ka jingleit ïasoh BJP jong ki 9 ngut k MLA jong katei ka seng trai ri; hynrei ka ju don ka jingong ba ki sla dieng kin ym khih, khlem ka jingbeh ka lyer lane ka tdem kan nym mih, lada kam don ka phliah ding haei re
U bah Metbah, u lah ban thaw ktien ha kano kano ka dur, hynrei ka jingshisha ka kren, ba uba pyllait paidbah ïa kane ka khubor, u dei U Sambit Patra, u heh jong ka seng BJP, ha kaba ula ïathuh ïa ka jingïakynduh jong ki MLA UDP ïa U Amit Shah, myntri ka sorkar India ha Delhi bad katei ka jingthoh jong U Patra, kam don daw eiei ruh em, ban ïakren ïa kita ki ishu jong ka FCRA, MRSSA bad kiwei, lada kam don da ka jingmut kaba ïadei bad ka kam saiñ pyrthei lane lada kam dei shisha ruh, ka pyni ba utei u heh BJP, ula shu pynbudnam kai ïa kitei ki 9 ngut.
Donbok ba ka jingkren jong u heh duh ka UDP, kan long kaba dei, hynrei ka wan ka jingkylli ba kumno sha kat ka BJP, kan klet ban buh jingbam bang ha u khwai jong ka ban riam ïa kitei ki 9ngut ki MLA?
Ha kajuh ka por, kane ka dei ka khyllipmat ïa U Conrad Sangma, uba dei u heh duh ka NPP, ba un shim khia ïa kane ka mat i kumba ula shong kynjah ha kine ki khyndiat sngi ba ladep, naduh ba ka mih kane ka khubor bad kata ka long, ba un pyrkhat ban ïatreilang da kaba burom ïa ki MLA UDP, ba un ai shuki Myntri kaba biang bad kaba heh ïa ki bad ba un weng noh ïa kine ki Symbud Myntri rangbah jong u kiba don ha kti ka mon ka kti ka diang, hynrei un ai noh tang uwei na ka UDP bad lada kan long kumta, khlem pep kane ka jingiakynad kan lah ban dait thah noh kloi.
U Conrad Sangma ïa mynta la ïohi, ba u ñiew burom ïa kito ki MLA kyntiap seng, kiba leit rung sha ka NPP, hynrei u dei ban kynmaw, ba ha ka por ba ka NPP kam don ka jingbiang briew kaba pura ha u snem 2018, ka dei ka UDP kaba pynlong Myntri Rangbah ïa u wat la um dei satia tang U MLA ha katei ka por, hynrei la ïohi, ba une u samla rangbah, ula klet noh kloi ïa katei ka mat bad mynta ula pynlong jingsar kjat ïa katei ka seng, kaba la pyllait ïa u na ka saw ka sian.
Ka por kam shah slem bad U Conrad Sangma lem bad U bah Met bah Lyngdoh, ki dei ban ïakynduh kyrkieh ban ïakren ïa kane ka mat, hynrei lada jia ba ki bakla ka phormula ha kane ka kynti, kumta ka bor jong ka BJP, kan khynra shwa ïa ka UDP bad mar ïa dep ïa ki 9 ngut jong ka UDP, kan khynra syndon sa ïa ka NPP bad ka sorkar ha shwa ka elekshon 2028, ka la ka thikna ba kan dei ka sorkar BJP.
Kumba long mynta katto katne ngut na ki MLA ka UDP ki la thrang ban leit pynïasoh noh bad ka BJP watla ym tip la ka BJP kan pyntreikam ne em ïa ki jingdawa jong ka jaitbynriew, hynrei ka por kan ap bad batai halor kane naba ym lah ban tip shuh la ka sorkar ba la lam da ka NPP ha ka jylla Meghalaya kan dang ïaineh haduh kaba kut jong kane ka samoi treikam jong ka, ne kan hap ban kylliang noh ïa ki Myntri jong kane ka sorkar ne kan hap ban pynhun pat sa ïa kiwei pat ki paralok, kane kan dei ka jingkylli kaba eh bha ban ïathuh lypa.
Kane ka la pynlong ruh ïa kiwei pat ki seng saiñ pyrthei ba kin shim kabu da kaba wohdong wohnia ha kaba ïadei bad kane ka jingmih bad ka jingat phalung jong ka saiñ pyrthei ha kane ka jylla. Kumba ka long mynta lada kine ki jingdawa jong ki MLA ka UDP ki urlong shisha kan long ka jingmyntoi kaba khraw ïa ka jylla bad ki nongshong shnong jong ka bad lada kine ki jingdawa jong ka UDP ki long tang malu mala kan long pat ka jingeh ïa ki paidbah ha ka jylla.
Ngi dang ap khmih lynti ïa ki jingdonkam kiba lah ban mih na kane ka jingïakren pynbeit jong ki na ka bynta ka jingmyntoi jong ka jylla ha kine ngi ban wan.
Ha kane ka por kaba mynta ka jylla ka donkam shisha ïa ka jingpynlait noh ban pyntrei ïa u dewïong ka ban long ka jingmyntoi ïa ka jylla bad ki nongshong shnong jong ka jylla bad kumjuh ruh ka jingdonkam kaba long kaba donkam bha na ka bynta ka roi ka kiew bad ka san ka jingkiew jong ki paidbah ha kane ka jylla.
