Shillong, Nailur 20: Ka Meghalaya ka la pyni ïa ka jingkut jingmut da kaba wanphai na ka shi kol ban pynliem ïa ka Punjab da 2-1 ha ka Group C jong ka lympung Dr Talimeren Ao National Football Championship na ka bynta ka Junior Girls (Tier 2) 2026-27 ha Narainpur, Chhattisgarh.
Ka Meghalaya ka la shah thep ha ka minit kaba 10 hynrei ka la pynïakhaid noh ha ka minit kaba 61 lyngba ka Ripaia Phawa shuwa ba ka Peacefully Pohplet (90’+4) kan thep ïa ka namtam ha ki minit pynjlan ba khatduh.
Kumba ka long, ka Group C ka la shah pynduna sha ka lai tylli ki kynhun namar ka jingweng noh ka Nagaland. Hadien ba ka la pynliem ïa ka Jammu and Kashmir da 8-0 ha ka jingïakhun ba nyngkong, kumta ka Meghalaya ka la ïoh ban khur pura 6 poiñ na ki ar tylli ki jingïalehkai bad pynskhem ïa ka kyrdan ba nyngkong ha ka group.
Ka Haphilabet Kharkongor, coach jong ka Meghalaya, ka la wanrah ar tylli ki jingkylla ha ka kynhun ba sdang, da kaba wanrah ïa ka Venecle Kharmusulman bad ka Deiphiwansara Lyngkhoi ha jaka jong ka Saralang Lapang bad ka Bansara Rynshiang.
Ka Meghalaya ka la shah pynshitom dang kloi ha kane ka jingïalehkai, ha kaba ka Punjab ka la lamkhmat na ka free kick jong ka Japleen Kaur (10′), kaba ka nongap kol jong ka jylla, ka Dawansaphi Snaitang, kam shym la lah ban khanglad.
Hynrei ka jinglamkhmat jong ka Punjab ka la neh tang 50 minit shuwa ba ka Meghalaya kan pynïakhaid lyngba ka Ripaia.
Ka jingïakhun ka la ïakhaid mar 1-1 tad haduh ka minit pynjlan ha kaba ka Meghalaya ka la pynkyndit da kaba thep ïa ka namtam lyngba ka Peacefully (90’+3).
Kane kadei ka jingjop kaba kongsan namar ka la pynthikna ïa ka Meghalaya ba kan rung beit beit sha ka Semifinal khlem da donkam ban ap ïa ka resol na ka jingïakhun jong ka Punjab pyrshah ïa ka J&K ha ka 22 tarik u Nailur.
Hynrei ka Meghalaya kan hap ban ap sa katto katne sngi, na ka bynta ka Semifinal jong ka, kaban long pyrshah ïa ka kynhun ba wan ha khlieh duh jong ka Group A, ha ka 25 tarik Nailur.
Ki thei ïalehkai ka Meghalaya kiba la mih madan:
Dawansaphi Snaitang (GK), Ripaia Phawa, Paleimon L Lyngkhoi, Daficare Lyngkhoi, Nishalin Nongrum, Venecle Kharmusulman (sub Bansara Rynshiang HT), Bandabetshisha Nongrum (sub Saphidabet Kharmalki 67′), Peacefully Pohplet, Vanessa P Mawthoh, Deiphiwansara Lyngkhoi, Jenisha Rani
