Jowai, Nailur 19: Ka kynhun ïalehkai phutbol jong ka SWO Moosianglamare Old SC kala ïohrah ïa ka nam lahduh haka lympung phutbol kyrdan ‘Second Division League Stage 2025’ bala pynïaid daka East Jaiñtia Hills District Football Association (EJHDFA), da kaba jop ïa ka jingïakhun phainal ha ka sngi Saitjaiñ, ha madan Artificial Ground Diengshynrum, Khliehriat.
Ka jingïakhun phainal ka la long pyrshah ïa ka Dkhiah West SCSO ha kaba ka SWO Moosianglamare Old SC ka la khur ïa ka jingjop da 2-1.
Haba phai sha ka jingïalehkai, ka SWO Moosianglamare Old ka la ïoh ba kan lamkhmat lyngba u Premio Muksor (25’), hynrei kane ka kol ka la neh tang 5 minit naba ka Dkhiah West SCSO kala ïoh ban pynïakhaid lyngba u Kyntulang Phawa (30’). Baroh arliang ki la jam sha ka por shongthait da mar 1-1 kol.
Haba wan ban bteng ïa ka jingïakhun ha ka kylla miet, ka SWO Moosianglamare Old SC kala ïoh biang ban lamkhmat na ka kol jong u Rejency Lapasam (70’), kaba la paw ba ka la biang ïa ka kynhun ba kan khur ïa ka jingjop.
Ha kane ka lympung ïa ka nam Top Scorer la ïoh da u Pyniar Pusein naka SWO Moosianglamare Old SC uba la thep haduh 4 kol, ïa ka nam Best Goalkeeper la ïoh da u Kynti Muksor naka SWO Moosianglamare Old SC, ïa ka nam Best Player la ïoh da u Meshwa Lapasam naka SWO Moosianglamare Old SC.
Ïa ki khusnam sha ki nongjop la sam da u kongsan jong kane ka sngi u ma Pynlumlang Ksoo, ha ryngkat ka jingdonlang u symbud kongsan ma Dimos Swer lem bad ki Nongkitkam ka EJHDFA, ki riew Rangbah jong ka District bad ki paid riew ieit phutbol jong katei ka thaiñ.
Na ka bynta ka kynhun kaba ïoh rah ïa ka nam lahduh ka SWO Moosianglamare Old SC kala ïoh khur ïa ka song khusnam kaba 50 hajar tyngka lem bad ka trophy, katba ka kynhun ba wan ba ar ka Dkhiah West SCSO kala ïoh 25 hajar tyngka lem bad ka trophy.
