Yn bishar bniah biang ka Sorkar ïa ka kaiphod halor ka jingkynnoh bamsap ïa ka skhim Saubhaya

Shillong, Iaiong 5 : U Myntri ka tnad pynmih bording ka jylla u Abu Taher Mondal ha ka Sngi Balang u la ïathuh ba ka sorkar kan sa shong bishar bniah biang ïa ka kaiphod jongka jingtohkit ka Committee halor ka jingkynnoh bamsap ha ka jingpyntreikam ïa ka skhim Saubhagya.
“ Ngi dang ïakren bad ïabishar bniah bad hadien kata ngin sa lah ban rai aiu ba dei ban leh” ong u Mondal.
Haba la kylli hato ka don ne em ka jingbamsap haba pyntreikam ïa kane ka skhim u myntri u la jubab kumno yn lah ban ong ïa kata namar kane ka dei ka jingkynnoh bad na kata ka daw la thung ïa ka jingtohkit ba laitluid khnang ban paw ki jingshisha.
Dang ha kane ka Dorbar Mang Tyngka u Mondal u la ïathuh hapoh ka ïing dorbar thawaiñ ka jylla ba ïa ka kaiphod la phah sha ka tnad pla tyngka ka jylla khnang ba kan ai ïa ki jingkynthoh na ka liang jongka.
Hadien ba la dep bishar bad ai jingthoh da ka tnad pla tyngka yn sa lah ban tip la ka don ne em kata ka jingpyndonkam bakla ïaka skhim, ong u Mondal haba jubab ïa ka jingkylli ba la wanrah da u MLA ka Umsning u Dr Celestine hapoh ka ïing dorbar thawaiñ.