Shillong, ïaïong 05: Ka jingpyllip bor ding elektrik ne ka load shedding da ka tnad bording ka jylla, ym tang ba ka wanrah ka jinglynga bad pisa mynsiem ïa ki paidbah, pynban ka long ruh ka kabu ïa ki nongtuh nonglute kiba ap kmang lano ban lip ka ding elekrik ban leh ïa ki kam pyntriem jong ki.
Ki khubor ba la ïoh na kylleng ki shnong, ki ïathuh ba ki riew sniew ki la sdang ban kyndang bad prong ïing ha ki kynta ba pyllip bording khamtam ha ka por shiteng synñia haba ki briew ki la ïoh thiah bha.
Da ha kane ka Lah Sngi U Blei, ki riew runar ki la prong ïa kumba san tylli ki ïing ha Kynshi, ha kaba ki la kyndang ïa ki jingkhang da ki kynja nar kum ki sha lyngka bad kiwei kiwei ban pynjot ïa ki hook kiba la khang napoh ïing. Ki don ki ïing kiba kine ki runar ki la ïoh rung shapoh ïing, namar la lap ruh ïa ki dienjat ba kiba paw ba ki rung hapoh ïing bad ïaid ïa ka ïing baroh kawei. Kaba lyngngoh ka long ba kumno ki trai kim ïoh sngew haba kine ki runar ki rung shapoh ïing. Lehse kine ki runar ki rung ha ka por ba jur slap ne ha ka por ba jur ka lyer ruh.
Katkum ka jingïathuh ki paidbah la suba ba kine ki runar ki don bun ngut bad ki wan da ki kali ban ïaid na kawei ka shnong sha kawei pat, namar kaba la jia ha Kynshi kam dei ïa ki ïing kiba don marjan, hynrei ki ïing ki la jngai na kawei sha kawei pat.
Haba ïakren bad ki Pulit ki la ïathuh ba kine ki sngi kidei kiba ki nongtuh nonglute ki jyllei bha bad ka jinglip bording elektrik ka nang pynshlur shuh shuh ïa ki ban leh ïa kine ki kam runar. Ki la ïathuh ba ki don bun ngut kiba la shah kem bad khambun na kine kiba shah kem kidei kiba ju mlien ban dih drok.
Na ka liang ki Pulit ki kyntu ïa ki paidbah nongshongshnong ban husiar bad peitngor bha ha ka por mynmiet bad ban pahara bha ïa ki shnong ki thaw bad ki ïing ki sem, khnang ba kine ki riew runar kin nym ïoh shim kabu.
Na ka liang ki bor shnong ruh ki ai ka jingmaham kaba tyngeh ïa kino kino ki briew ki bym ithuh kiba rung kulmar sha ki ïing ki sem jong ki briew la ka long ha ka por mynsngi ne mynmiet ruh. Lada lap na ka liang ki Shnong kin ai da ka jingpynsajia kaba shitom bha kaba kin kynmaw sah junom la junom.
