Ba knieh ki nongñiah kali bar jylla ïa ka kamai Taxi, kynduh ka EKHLTWA ïa u EM ka KHADC
Shillong, Ïaïong 05: Namar ka jingjyllei ki briew ba na bar jylla bad ki bym dei Khasi ban wan kamai ñiah taxi ha Shillong kaba long kum ka jingknieh noh ïa ka kamai ñiah kali ki driver trai muluk, ka East Khasi Hills Local Taxi Welfare Association (EKHLTWA) ha ka sngi balang ka la leit ban ïakynduh ïa u Executive Member ba dei peit ïa ka Trade ka Khasi Hills Autonomous District Council (KHADC) u Bah Rangkynsai Kharbuki ban dawa ba ka KHADC ka dei ban pyntreikam ïa ka Labour License ha kane ka kam kum ka sienjam ban tehlakam ïa kane ka jingjyllei ki bar jylla ha ka kam ñiah kali.
Haba kren sha ki lad pathai khubor hadien ba la dep ban ïakynduh bad u EM ka Trade, u General Secretary ka EKLTWA u Bah Alkwiz John Kharbani u la ïathuh ba ka jingïakynduh ïa u EM ka dei ba namar kat haduh mynta ym pat ju don uwei ruh u nongñiah kali uba don ïa ka Labour License kumba jia ha kiwei pat ki nongbylla ba trei ïa kiwei pat ki jait kam bad kumjuh ruh ban dawa ba ka KHADC kan pyntreikam ïa ka iktiar jong ka ha kaba ïadei bad kane.
“Namar ki nongwan ñiah kali ki don kiba na kiwei pat ki jylla kum naduh na Bihar, Assam bad kiwei ki jylla hynrei ka District Council kam ju pyntreikam ïa ka iktiar jong ka ha kane ka kam kamai kumba leh ha kiwei pat ki jait kamai bad ngan ïathuh ïa phi ba ym ju don uwei ruh uba don ïa kane ka Labour License,” u la ong.
“Ha ka jingïakynduh ngi la ai jingmut ba ka KHADC kan pyntreikam noh ïa ka iktiar jong ka ha kane ka bynta ba kan long kum ka jingteh lakam ïa ka jingwan knieh ki briew kiba na bar jylla ïa ka kami jong kiba bun bah ki nongñiah kali trai muluk jong ka jylla bad ngi la ai jingmut ba ynda la pyntreikam ïa kane ba ka KHADC kam dei hi ban ai license ïa ki bar jylla ba kin wan kamai namar ki trai muluk ka jylla ki la nang ban trei ïa kane ka jait kam,” u la bynrap.
Shuh shuh u la ong ba namar u EM ba dei peit ïa ka tant Labour jong la KHADC u Bah Victor Rani um don na ka liang u EM ka Trade u Bah Rangkynsai u la kular ba na ka liang jog u un sa rah ïa kane ka mat ha ka jingïalang jong ka Executive Committee.
U la ong ruh ba lada ka KHADC kam sngap ïa kane ka jingai jingmut na ka liang ka seng kan sa shong pyrkhat da ki sienjam aiu ba kin shim.