Shillong, Iaiong 05: Ka Khasi Students’ Union (KSU) ka la ong ba ka jingïakren ban pdiang ne kyntait ïa ka Rel ha Meghalaya kan wan tang hadien ba ka sorkar ka pyntreikam ïaka inner line permit (ILP) hapoh ka jylla.
ïa kane ka rai la shim ha ka jingïalang jong ka General Executive Council (GEC) bala long haka 4 tarik mynta u bnai ka ba dei ruh ka jingïalang naka bynta ban ïakren halor ka jingjied nongkitkam thymmai jong ka Central Executive Committee (CEC) ka KSU seng kmie.
Haba kren sha ki lad pathai khubor u President ka KSU u Samla Lambokstawell Marngar ula ïathuh ba ka GEC kala aiti sha ka election committee jong ka seng na ka bynta ban pynlong noh ïa ka ilekshon ka ban long haka 6 tarik Jymmang.
U Samla Lambok ula ong ba haka jingïalang jong ka GEC ka seng ka la shim ïa ka rai ban ïai dawa naka sorkar ban pyntreikam ïaka ILP ïa ka ba ka seng kala dawa naduh u snem 1987.
Ula ïathuh ba ka seng ka la dep ruh ban thoh sha u myntri rangbah duh ka ri India ban dawa tuklar bad ban pyntreikam noh ïa ka ILP ïa ka ba ka ïing dorbar thaw aiñ ka Meghalaya ka la dep ban mynjur da ka Resolution ha ka 19 tarik Nohprah 2019.
“Ngi donkam ban pynkynmaw ïaka sorkar pdeng bad na ka por sha ka por ka seng ka ju pynkynmaw lyngba ki myntri sorkar pdeng kiba ju wan jurip ïa ka Meghalaya ba la donkam ban pyntreikam noh ïa ka ILP hynrei haduh mynta ka seng kam tip balei ym lah ban pynurlong ïa ka jingdawa ILP ha Meghalaya” la ong u Samla Lambok.
Lah ban kdew ba u myntri rangbah ka jylla u Conrad K Sangma dang shen ula ong ba ki paidbah ka jylla kim pyrshah ïa ka Rel hynrei ki pyrshah ïa ka jingwan rung beaiñ ki briew bad ban tem ïa kane, ka ILP kadei kawei ka lad.
Haba ïadei bad kane u president ka KSU ula ong “Ka mat hapdeng ka Rel bad ka ILP ka ïapher bad ka KSU ka dawa shwa ïa ka ILP bad hadien ba la ïoh ïa ka ILP, ngin sa ïakren la ngi pyrshah ne pdiang ïa ka rel”.
U Samla Lambok ula ong ba ïa ka ba mynta ym pat lah ban ïakren halor ka Rel namar wat haduh mynta ka jylla kam pat ïoh ïa ka ILP bad dei namar kane ka seng ka kwah ba ka sorkar kan pynkut noh ïa ka jingïakren halor ka Rel.
