Ym pdiang ka Shnong Mawrang ïa u Acting Sordar jong u Syiem, kwah da u Sordar ba pura

Nongstoiñ, ïaïong 24: Ka Dorbar Pyllun Jong ka Shnong Mawrang West Khasi Hills District kaba hap hapoh Rambrai Syiemship ha ka 22 tarik iaiong 2023 ka la ïoh ban pynlong ïa ka Dorbar hapoh Mawrang Secondary school naduh ka por 7 baje mynstep ha kaba la wan ban ïashim bynta da ki Paitbah Nongshong shong Jong kane ka Shnong .
ïa ka Dorbar la pyniaid da u Bah KP Marthong acting sordar bad u Secretary ka Shnong. La record ia ki Rai Jong ka dorbar da u Bah G.L .Langrin. Ha kane ka dorbar la ïoh ban pynsngew ïa ki Report ba pher bapher ha kaba iadei bad ka umbam umdih lyngba ka shim JJM, la ïoh ban pynsngew halor ka jingithuh noh ïa ki 2 tylli ki kyntoit Shnong kata ka Dong Disong bad dong Lumsohjhur kum ka dong Block 5 bad Block 6, kumjuh ruh bad kiwei pat ki kam ba la pynsngew hapoh kane ka Dorbar. Ha kaba ïadei bad ka kam Jied Sordar Shnong, kata naduh ba u Sordar barim u Bah Pilot Nongphud u la iehnoh kam noh na ka kam Sordar naduh u Kyllalyngkot mynta u snem ka Shnong ka la jied ia u Bah KP Marthong kum u Acting Sordar hapoh ka Shnong bad la pyntip sha u Syiem ruh bad sha kiwei pat ki ophis sorkar.
Hynrei kaba lyngngoh ka long ba na ka Liang Jong u Syiem Rambrai um shym la pdiang ïa kane ka jingjied Acting Sordar jong ka Shnong Mawrang pynban u la thung pynban kum u Acting Sordar ïa u Bah Bormanding Nonglang. Ka Dorbar ka la rai ban nym pdiang ïa kane ka jongthung Acting Sordar jong u Syiem hynrei ka la shim ïa ka Rai ba u Syiem u dei ban wan jied noh da u Sordar uba pura ymdei da u Acting Sordar kata ha u bnai Jymmang mynta u snem.. Ka Dorbar ka la rai ba ïa ka jingjied Sordar dei ban jied da ka Secret Ballot bad ki Nongshong shong kiba la dap 18 snem shajrong kynthei bad shynrang ne tang ki shynrang kin jied ïa u sordar. Ia ka jinglut jingsep halor kane ka jingjied Sordar ka Hima kan pynlut hi.