Nongstoiñ, Ïaïong 24: Kum shi bynta ban kyntiew ïa ka jingpynmih ïa ki tiar ki tar ba bun jait ba kynthup ïa ki tiar ba shna da ki dieng, ki siej, ki jait jingthaiñ da ki ksai, ki jingshna ïa ki kynja jingbam bad ki jingbuh jingsat ha ki kamra shongkai ha ki ïing ki sem, ka Ministry of Tribal Affair jong ka sorkar pdeng lyngba ka Tribal Cooperative Marketing Development Federation of India Limited (TCMDFI Ltd) lyngba ka sorkar jylla, ka la bthah ïa ki bor pynïaid district jong ka West Khasi Hills, ban pynlong ïa ka prokram ba kyrpang kaba la tip kum ka Tribal Artisan Mela kaba ar sngi.
Na ka liang ka ophis jong u Deputy Commissioner, ka la pyntip sha kiba bun ki nong shna jingshna kum ki tiar tem tiar put tynrai, ki nongshna ïa ki jait jingbam, ki ba shna ïa ki jinbuh jingsat kiba pynitynnad ha ki kamra shongkai ha ki ïing ki sem bad kiwei.
Ka jingpynlong ïa katei ka prokram ka dei ruh kum shibynta ban lum jingtip ïa ka jingdon jong ki tiar ki tar ba ki nongshong shnong ha ki jylla ka thaiñ shatei lam mihngi, kiba dei ki riew lum ki ju pyndonkam bad ban lum thup ïa ki tiar ki tar na ka bynta ban pyninam ha ka International Market lane ka ïew jong ki ri shi tyllup ka pyrthei bad ruh ban pyni nam, na ka bynta ba ki riew shemphang jong ki ri ka pyrthei kin leh ïa ka jingwad bniah, ïa ka jinglong tynrai jong ki jaitbynriew kiba shong ha ki jylla bapher bapher hapoh ka ri.
Hynne ka sngi ki nongshong shnong kiba la wan ban ïa shim bynta ki la wanrah ruh ïa ki tiar tem tynrai kum ki duitara, ki ksing padiah, ki tiar ba la thaiñ da ki siej kum ki prah, ki shang, ki khoh bad kiwei kiwei. Nata ki don ruh kiba la wanrah ïa ki pla ba la thaiñ da ki ksai ba bun rong ba ki ju khot ka pyrwa muliang, ki jingpynitynnad ba la oh shrong bad pynwandur da kiba bun rukom. Ki la don ruh ki longkmie kiba wanrah ïa ki mar bam ba ki la pynmih hi kum ki ashar, ki um ngap, umsoh bad kiwei kiwei.
Uwei na ki u dei u bah Dominik Lyngkhoi uwei na ki nongshna ïa ki tiar put tiar tem tynrai u ba dei ruh u nongshem ïa ki ar tylli ki tiar tem tynrai, kata ka shitara bad ka saitara kiba ka dur ka long thik kum ka duitara hynrei ka rukom tem bad ka rukom teh ksai pat ka ïapher.
U bah Lyngkhoi u la ong ba ka jingshem thymmai jong u ïa kitei ki tiar tem tynrai, ka dei hadien ba u la pynleit jingmut bad u la pynlut por ban wad bniah ïa ka jinglong tynrai jong ka jaitbynriew Khasi. Haba u la lap bad shna ïa kitei ki ar jait ki jingtem tynrai u la pynshong nongrim ha ka rukom pynïaid ïa ka long kur long jait bad ka ïing ka sem.
U bah Lyngkhoi u la ong ruh ba u kwah bad angnud ba ki skul bad ki college ha ka jylla, kin pynrung ïa ka tem ka put ha ki sur tynrai kum kawei na ki subject, khnang ban pynim pat ïa ka jinglong tynrai ba la ïalam da ki long shuwa man shuwa. U kloi ruh ban leit ïarap sngewbha ha kaba hikai ban tem ïa ka shitara bad ka saitara lada don kino kino ki kynhun, ki skul, ne ki seng kiba kwah ban pynkhie im biang ïa ka jinglong tynrai ka jaitbynriew Khasi lyngba ka tem ka put.
