Nongstoiñ, Ïaïong 24: Ha kine ki sngi ki nongtuh ha sor Nongstoiñ ki la sdang ban jyllei biang, namar haman la ki dong ka jingshah kyndang ïa ki dukan ka jur bha haduh ba ka la pynjynjar bad pynsyier lut ïa ki trai dukan.
Tang hapoh kane ka taïew bun tylli ki dukan ha Siejlieh, ïew Nongstoiñ, bad kiwei kiwei ki jaka ki la shah kyndang bad shatuh lut ïa ki mar ki mata. La ïoh jingtip ruh ba wat ha ka por mynsgi mynshai ruh ki nongtuh kim salia shuh ban prong ïa ki ïing briew lada dei ha ki jaka ba kham kynjah ki briew ba ïaid ba ïeng.
U Bah T.Marweiñ uwei na ki riew rangbah, u la ong ba kitei ki nongtuh ki lah ban pynpait ïa ki tala khlem da bom da u tyrnem ne ki kynja nar bad haba ki la ïoh ban rung shapoh ki dukan ki kit ïa ki khaw, ki shini, ki umphniang, phan, ki jaiñ ki nep bad katba don ki jait mar.
Na ka liang ki nongshong dukan ïew Nongstoiñ bad ha shilynter ka surok hapdeng sor, ki la ong ba ka la donkam ïa ki nongsynshar shnong bad ki VDP ba kin pynlong noh da ka jingap miet, ban lap ïa kiba don kti ha kaba prong ïa ki ïing briew bad ki dukan.
Ki paidbah na kylleng kylleng ki Shnong ka West Khasi Hills bad Eastern West Khasi Hills ruh, ki la ïathuh ba kane ka jingprong ïing ba jur bha ruh ha kiwei kiwei de ki Shnong, ha kaba ki riew runar ki wan prong ïing hadien ba la lip ka bor ding elektrik ba ju pyllip ne ka load shedding jong ka MeECL.
Don ki Shnong kiba la pynlong ruh ka jingïa ap pahara ha ka por mynmiet khnang ban ïada ïa kane ka jingwan prong ïing ki riew runar.
