La pynkut noh ïa ka Shad Suk Mynsiem jong ka South West Khasi

0

Mawkyrwat, Ïaïong 24: Ka Seng Khasi jong ka South West Khasi Hills District (SKSWKHD) ha ryngkat ka jingïatreilang bad ka Seng Khasi Sakwang, da ka jingiphuh iphieng ryngkat ki riam ba itynnad jong ki nongshad shynrang bad kynthei ha ka sngi nyngkong jong ka taïew ka 24 tarik u Ïaïong, 2023 ka la ïoh ban pynkut noh ïa ka Shad Suk Mynsiem (SSM) ba IX (khyndai) ha madan shad hapoh Shnong Sakwang, South West Khasi Hills District.
Kane ka shad-ka-kmen ka long shibynta kum ka jingkynmaw bad jingainguh u Khun Khasi Khara shisien shisnem ïa U Blei U Trai Kynrad U Nongthaw U Nongbuh na jrong na tbian ban neh la ka Hok la ka Riti ïa kaba la sdang naduh ka 23 tarik u Ïaïong, 2023, ha kaba la sdang shwa da ka nguh ka dem ka duwai ka phirat da ka kynhun ki ‘riew tymmen ‘riewsan ka Seng Khasi South West Khasi Hills District khnang ba ka Shad Suk Mynsiem kan bit kan biang.
Shuh shuh, ha ka 23 tarik mynta u bnai, kaba dei ka sngi sdang jong kane ka Shad Suk Mynsiem Seng Khasi South West Khasi Hills District, la ïoh ban plie bad pynher ïa ka lama ha ophis jong ka Seng Khasi ha Mawkyrwat ha ka por 12:30 shiteng sngi da u Vice President ka Seng Khasi, South West Khasi Hills District, u bah Thwor Wartde, ha ryngkat ka jingïadonlang ki ‘riew tymmen ‘riewsan jong ka Seng Khasi South West Khasi Hills District ka dei hapoh ka jingïalam jong u bah T. Kharlyngdoh, President Seng Khasi South West Khasi Hills District bad la leit ban pyndep ïa ka jingduwai phirat ha ryngkat ka jingkyntiew ïa ka lama ha ka por 3 noh phai sngi.
Ha ka sngi ban pynkut ïa kane ka Shad Suk Mynsiem jong ka Seng Khasi jong ka South West Khasi Hills District (SKSWKHD) ha kaba la ïoh ban pynhiar noh ïa ka lama da u bah Phrial Ryntathiang, President ka Seng Khasi West Khasi Hills District bad ha kajuh ka por u la ai ruh ki kyntien jingaikhublei bad jingkyrkhu kyrdoh ïa ka Seng Khasi South West Khasi Hills District ba kan nangroi bad ïaid shaphrang ban pynneh pynsah ïa la ka riti ka dustur u Khun Khasi Khara bad nangphuh nangphieng bad nangïar na uwei u snem sha uwei pat.
Ha kajuh ka por u la ai mynsiem ruh na ka bynta ki khynnah, ki samla ba kin long borabor kiba ri ïa la ka akor ka burom bad long ruh kiba minot khamtam eh ha ki jingpule ba ki ki don khnang ba kin nanglah ban nangkiew na kawei ka kyrdan sha kawei pat bad ba ka lawei jong jong ki kan long kaba phyrnai.
Ha kane ka sngi, ki la don haduh 64 ngut ki ‘thei nongshad bad 87 ngut ki ‘rang nongshad kiba la wan ban ïashimbynta da na kylleng ki shnong ha ryngkat ki hep kiba rit kiba la pyni shisha ïa la ka jong ka shad tynrai kaba phuh kaba phieng.
Ha kajuh ka sngi kum ka dak jong ka jingburom ïa ka jingkhlad noh jong uwei na ki dkhot jong ka Seng Khasi South West Khasi Hills District uba dei ruh kum u Secretary kata u bah Ranjistar Iawphniaw, na ka liang ka Seng Khasi South West Khasi Hills District lyngba u bah T. Kharlyngdoh ki la pynlong ka jingïa-ïeng lang baroh ryngkat ka jingsngap jar ba shi minit.
La pynshit pynshngaiñ ïa kane ka Shad Suk Mynsiem jong ka South West Khasi Hills da ka jingïadonlang u bah D. Syngkon, District Sports Officer, South West Khasi Hills District, u bah S.I. Laso, Assistant Executive Engineer PWD (Roads) Mawkyrwat Sub Division, u bah Kynpham V. Kharlyngdoh, Muktiar ka Supreme Court, u bah S. Kharjahrin, Myntri Shnong Sakwang, ki ‘riew rangbah jong ka thaiñ, ki nongïalam jong ka Seng Khasi South West Khasi Hills District bad jong ka Central Body lem ruh bad ki paidbah nongwan peit kai na kylleng ki shnong.

Leave A Reply

Your email address will not be published.