Ym pat lapdien ïa u samla 16 snem bajah na Mawkyrdep, lap tang ka pla ha Umroi Retreat Centre ha Umroi

Nongpoh, Nailar 10: La kot sha ka 10 sngi naduh ba u Mebanteinam Ramshon, 16 snem ka rta, u la jah na la ïing ha shnong Mawkyrdep, thaiñ Umroi, ha Ri-Bhoi District hynrei haduh mynta ki bahaiing bad ki pulit kim pat ïoh jingtip kaba shai ïaka jaka ba u don.
Katkum ka kyrwoh na u Superintendent of Police ka Ri-Bhoi, la ïathuh ba ka kmie jong u samla, ka Kong Matisha Ramshon, ka la ujor da ka ejahar hadien ba u khun jong ka u la jah naduh ka 1 tarik Nailar 2026, ha kaba u la mih na la ïing da ka jingthmu ban leit bad u riew niam.
Naduh katei ka sngi, ki bahaiing ki la pyrshang ban wad ïa u ha ki bynta bapher bapher, hynrei la lap tang ka pla jong u ha Retreat Centre, Umroi Nongrah.
Shuh shuh ha ka sngi kaba bud, u Mebanteinam u la phone ïa ka kmie lyngba uwei u number 6009666700, da kaba ïathuh ba u don ha Shillong, bad u la pan ruh ïa ka Aadhaar Card jong u. Hynrei, haba ka kmie ka phone biang sha utei u number, la lap ba u trai jong u number u don ha kad liengsuiñ Guwahati bad dang pynkhreh ban leit kiew liengsuiñ bad ka kmie ka la ong ruh ba u khun jong ka u don lang bad u ha katei ka por shuwa ban kut ka jingïakren lyngba ka phone.
Naka liang ki pulit, la register mukotduma ha Umiam Police Station bad la pynlong ïa ka jingtohkit ban lapdien ïa u samla bad ha ka por ba u jah, u la phong da ka patlun iong, T-shirt iong bad ka sandal.
Ki pulit bad ki bahaïing ki la kyrpad ïa kino kino kiba don jingtip shaphang ka jaka ba u Mebanteinam Ramshon u don ban pyntip mar-mar sha ki bor pulit lyngba Police Control Room-6909300160, lane ha Umroi PIC- 6909300151.