Ym pat lah pynbna ïa u kyrtong MP, aiti ha ka SEC ban jied da u ba kynsai tam

Shillong, Naiwieng 13 : Ka United Democratic Party (UDP) kam pat lah satia ban pynbna ïa u kyrtong ban aireng ha kane ka elekshon MP kaban sa long shen ha u snem ban wan namar ka jingbun palat ki kyrtong kiba kwah ban aireng.
Kumta, na ka liang ka Party ha ka Central Executive Committee kaba long hynne ka sngi Nyngkong ka la shim ïa ka rai ban aiti noh ha ka State Election Committee ban bishar bad jied ïa u kyrtong uba kynsai tam ban mih aireng na ka tiket jong ka party.
“Mynta ka sngi ka CEC ka la mynjur ïa ka State Election Committee na ka bynta ka elekshon MP (Shillong seat) bad ruh na bynta ka elekshon MDC. Hynrei haba ïadei bad ka Tura seat ka CEC ka la pynkhamti ha ka Core Committee jong ka party ryngkat ki katto katne ki nongïalam ba la rangbah jong ka party na rilum Garo ban ïa shong pyrkhat,” ong u President ka UDP Bah Metbah Lyngdoh haba kren bad ki lad pathai khubor ha ophis treikam jong ka party.
Shuh shuh u la ïathuh ruh ba kumba ka la don ka jingïakren ha ka 07tarik mynta u bnai, na bynta ka elekshon MP kan don ka jingïatrei lang hapdeng ka UDP bad ka HSPDP .
Haba jubab halor ka jingkylli, u President u la pyntip ba shen ka party kan sa pynbna noh ïa u kyrtong ba ïadei na ka bynta ka elekshon MP.
U President u la pyntip ruh ba ka CEC ka la bthah ruh ïa ki District bad ki Circle ba kin pynkhlaiñ ïa ka party khnang ban pyntikna ba kin long kiba la pynkhreh lypa na ka bynta ka elekshon lada ka wan ha kano kano ka por.
Watla ka jingpan tiket na Shillong seat ka thnem bha da ka jingdon bun ki kyrtong kiba pan hynrei u President u la pyntip ruh ba na Tura seat haduh mynta ym pat don kyrtong tangba u ong pat ba ki shaniah ha ki nongïalam ka party ban shim ïa ka rai.
La ïoh jingtip ba ki kyrtong kiba pan tiket ki don lai ngut kata kynthup ia u President barim ka HYC Bah Robertjune Kharjahrin, President ka Khasi Authors Society Prof DRL Nonglait bad ruh u MLA barim ka Mawlai, Bah PT Sawkmie.
Na ka liang u President ka party u la pynpaw ruh ba um kwah ban kren ei ei ia kiwei pat ki party namar u ong ba ka nongrim jong ka party ka long beit ban iatrei lang bad ki party kiba don kajuh ka thong bad ka nongrim.
La pyntip ruh ba ha kane ka sngi la ïa kren ruh na ka bynta ka jingeh ki nongrep ha kaba ka komiti ba khlieh da u MLA ka Mawsynram kin kynduh lang ha ka taiew ba nyngkong jong u Nohprah ban ïatai halor katei ka bynta.