Shillong, Jylliew 5 : Ka sorkar jylla kam pat thaw ïa ka Expert Committee ka ban bishar bniah ïa ka Reservation Policy kat haduh mynta namar ym pat don kawei ruh ka Seng Saiñ Pyrthei ( Political Party) kaba la phah ïa ki jingai jingmut sha ka Committee of all Political Parties ba la khlieh da I Dr Ampareen Lyngdoh.
Haba ïakren bad ki nongthoh khubor mynta ka sngi I Dr Ampareen I la ong “ Katba ngim pat ïoh ïa ki jingai jingmut ne jingkdew lynti ne ki jingkylli kiba kumno ki seng saiñ pyrthei ki kwah ngim pat lah ban thaw ïa ka Expert Committee namar ïa ki dkhot dei ban jied bad thung hadien ba la tip kiei ki bynta ne ki mat ba ki seng saiñ pyrthei ki kwah ban pynkylla ne ban pynbeit ne pynshai ha ka polisi”.
Namar i la ong ïa ka Committee hi yn thaw tad hadien ba la ïoh pdiang ïa ki jingai jingmut ne ki jingkylli na ki seng saiñ pythei bapher bapher.I la ong ruh ba ïa ka Committee ba la khlieh da ma i ruh yn sa lah ban khot biang dei tad hadien ba la ïoh pdiang ia ki jingai jingmut ne ki jingthoh na ki seng saiñ pyrthei.
“ Ngim lah ban pyrkhat ban thaw lypa ïa kata ka Expert Committee lada ym tip kiei ki mat ba kin ïa pyrkhat ne ïathir ynda ki la ïa kynduh kum ki dkhot jongka Committee” ong I Dr Ampareen.
Kat kum ka jingïathuh jong I tang ka Khun Hynniewtrep National Awakening Movement (KHNAM) kaba lah phah ïa ka jingthoh tangba kane ruh ka long tang halor ka Office Memorandum ha kaba ïadei bad ka Roster System.
“ Na ka liang jong nga kum ka Chairman jongka Committee nga la ïai pynkynmaw ïa ki nongialam jong ki seng saiñ pyrthei ba kin phah noh kham kloi ïa ki jingthoh na ka liang jongki la ka dei sha I , sha u Myntri Rangbah ne sha u Chief Secretary” ong I Dr Ampareen.
Hynrei wat la katta ruh I la ong ba kham lah kaba ap khlem buh por namar kane ka kam ka long kaba khraw bad kaba hap ban pyrkhat jngai bad sani bha. “ Nga tharai ki seng saiñ pyrthei ruh ki don ha kajuh ka apot ne jingsngew namar kam long kaba suk ban shu pynkylla mar mar. Ka long kaba eh hynrei ka sorkar kan ym ong em, ai ba baroh ngin ïathir bad ïamir bha”. ong biang ka Chairman.
Ka sorkar ka la thaw ïa ka Search Committee kaba kynthup lai ngut ki dkhot ba khlieh ruh da u Chief Secretary ka jylla ban jied bad bishar ïa ki briew ki ban kynthup ha ka Expert Committee. Tangba kumba i la ong ba ïa ka Expert Committee lah ban thaw tad hadien ba la ïoh pdiang ïa ki jingthoh na ki seng saiñ pyrthei.
“ Namar lada mynta ngin thaw ïa kata ka Committee bad kata ka Committee kam don ei ei ban leh kam don jingmyntoi. Hooid na ka liang ka sorkar ka la ïoh pdiang ki jingbthah na ka ïing bishar ban ai jubab hakhmat ka ïing bishar bad ka sorkar ka la leh ïakaba donkam. Hynrei na ka liang ki seng saiñ pyrthei ki dang ïai bishar bniah shwa ban buh ki jingkylli ne ki jingai jingmut” pynkut I Dr Ampareen.
