Kiei ki lad ka sorkar ka shim ban khate ïa ka jingduna bording ha ka jylla

Shillong, Naitung 05 : Ka Iing bishar High Court jong ka jylla mynta ka sngi Balang, ka la bthah ïa ka Sorkar Jylla ba kan ai ïa ka kaiphod kaba bniah bad ba pura (comprehensive) kaba kdew ba kiei ki sienjam bala shim ban khate ïa ka jingduna bording elektrik hapoh ka Jylla.
“Ka Sorkar kan ai ïa ka kaiphod ba bniah ba kdew ïa ka jinglong jingman ha baroh kawei ka Jylla bad ai jingtip ruh ba bniah ha kaba ïadei bad ki District bapher bapher. Ka Jylla kan kdew ruh ïa ki sienjam ba la shim ban lah pynïoh tam ïa ka bording na ka National Grid bad kiwei ki tyllong kiba don ban khate ïa ka jingduna bording hapoh ka jylla”, ong ka Division Bench ha ka hukum hadien ba shong bishar ïa ka PIL ba la mudui da u Flaming Marak.
Ka hukum ka ong ba watla ka Sorkar ka la dep ai ïa ka status report (ka kaiphod ba long ba man mynta) hynrei ka khlem kdew pat ïa ki jinglong jingman ba pura.
ïa kane ka PIL la mudui ha u bnai Jymmang mynta u snem bad shuwa ka jingwan u slap lane ka jinghap u slap ka la wan. Ka dei ka jingduna bording ha ka jylla ha katei ka por namar ka jingduna u slap bad ka um ha pung Umiam ka la hiar bad ka la buh jingeh ban pynmih bun ïa ka bording.
Ka Jylla ka la pynpaw ba da ka jingwan u slap bad ba ka um ha pung Umiam ka la kiew, ïa kaba bun ka jingeh la lah ban leh eiei.
Ha ka affidavit ba la ai kham ha shuwa, la pynpaw ba ka jingdawa ïa ka bording ha ka Jylla ka la kot 200 mega unit shi sngi, ka jingsam bording pat ka kot tang 88 mega unit shi sngi.
Ka ïing bishar ka la pynpaw ba ha ka kaiphod jinglong jingman ba la ai da ka Sorkar jylla mynta ka sngi, katto katne ki jing kheiñ la ai ba pynpaw ïa ka thup jong ki nongai jingshakri ba kongsan (essential service providers) ba la pyllait na ka jingpynlip bording (load shedding), hynrei kam shym la pynpaw pat ïa ka jingdawa ba mynta bad ka jinglah sam ïa ka bording lane ba ka sorkar ka la batai ïa ki sienjam ba la shim ban pynkhlaiñ ïa ka jingsam bording elektrik.
“Ka long ka bym lah pdiang ba ka jingduna bording kan kot palat ïa ka 50 percent. Ka lah ban long namar ka jingduna slap lane kiwei kiwei ki jingeh ba ka don ka jingduna pynmih bording ïa katto katne por bad ka jingduna ka lah ban kot ym palat ïa ka 10% na ka jingdawa bording shisngi. Hynrei la paw ba ka jingduna bording hangne ka long palat ïa ka 50 haduh 60% na ka jingdawa bording bad kane ka jinglong jingman ka dei ka bym lah ban pdiang ha kane ka juk ha kaba bun ki kam ki jam bad ki kam ïing kam seng ki la shu sahteng namar ka jingbym don ka bording elektrik” kala ong.
Ka ïing bishar ka la bthah ïa ka Sorkar ban phaikhmat sha ki hydel project barit lane kino kino ki project pynmih bording khamtam eh naba ka Jylla ka dei kaba ïoh ïa u slap ba jur bad kaba don ïa ki jaka ba long riat ha kaba lah ban pyntreikam ïa ki project barit ban lah pyndap ïa ka jingdon bording jong ki shnong ba pyntrei ïa ki project.
Ka ïing bishar ka la buh ban shong bishar biang ïa kane ka mukotduma ha ka 25 tarik u Naitung.