Da ka Departmental Inquiry, phah tohkit ka Myntri ïa ka jingbret ki dawai ha Marten
Shillong, Naitung 05 : Ka Myntri ka tnad ka Koit ka Khiah jong ka sorkar jylla, Kong Ampareen Lyngdoh ha ka sngi Balang ka la hukum da ka Departmental Enquiry halor ka jingleit bret ïa ki dawai ha Marten bad pyntikna ruh ba kan leh tyngeh ban pyntikna ba kum kitei ki jingmlien kin ym jia shuh hadien habud ha ka tnad. “Nga la phah da ka Departmental Enquiry halor kane ka kam. Mar ïa dep ïa ka jingtohkit bad ïoh ïa ka kaiphod, ngan sa pyntip ïa ki paidbah kaei ka sienjam ba ngin leh bad kyrmen skhem ba ngin pynbeit ïa kine baroh,” ong ka Myntri haba kren bad ki lad pathai khubor ha kane ka sngi.
Tangba, katkum ka jingong jong ka, kane kam dei shuh ka sien kaba nyngkong ba ïa ki dawai ba la sniew (expired) ban bret noh. Hynrei katei ka jingjia kaba ju jia man ka por.
Dei ha ka 29tarik u Jylliew da ki lak tylli ki dawai ba la sniew ne kut ka por treikam kaba la kot sha ki klur tyngka la leit bret noh ha jaka theh niut kaba don ha Mawlai.
Kane ka jingjia ka la paw pyrthei hadien ba ki nongïalam jong ka Meghalaya Awaken Council Citizens (MACC) ki la buddien ïa ki trok Municipal h akaba la kit ïa kitei ki dawai ba la kut ka por treikam katba ki dang wan na ki thain Polo.
Hynrei ha ka 02tarik Naitung pat, ka Ophis u DHS (MI) u la pynshai ba kitei ki dawai ba la leit bret ha Marten ki dei kiba la kut ka por treikam kiba khlem lah ban pyndonkam na ka daw ka jingwan ka khlam COVID.
Halor kane, na ka liang ka Myntri ka la buh jingkylli ba kumno ki ïoh lad sha katei ka jaka theh niut jong ka Municipal ha Marten bad mano ba shah ïa ki kali bad bun kiwei kiwei ki jingkylli.
“Phim lah ban shu leit kumto sha ka jaka theh niut bad bret kat ïa kaba phi kwah namar ki don ki kyndon. Kum kine ki jingbakla ngim dei shuh ban ailad ba kin ïai jïa biang,” la bynrap biang ka Myntri.
Ka la pyntip ruh ba mynta ka la ïoh pdiang ïa ka kaiphod na ka ophis u DHS bad ïa kane kin sa phah sha ki heh sorkar ban pule bad wad jingtip shuh shuh namar kam dei shuh ka kam ka ban shu kynnoh mar kylliang.
Ka ong ruh ba shisien ba ki la ïoh ïa ka kaiphod kata ka la shai kaei pat ka sienjam ba kin leh.