Shillong, Naitung, 05: Ka jingap khmihlynti kaba la slem jong ki nonghikai skul SSA ban ïoh ïa ka tulop Arrear ka la wan urlong ha kane ka kynti hadien ba u Myntri ka tnat Pule Puthi jong ka Sorkar Jylla u Rakkam A. Sangma u la pyntip sha ka Meghalaya SSA School Association ba ka tnat Pla Tyngka jong ka Sorkar Jylla ka la pyllait ïa ka tulop Arrear kaba T.12.44 klur antad kaba dei ka First Installment na ka bynta ka Financial Year jong u snem 2016-2017.
Ha u kyrwoh ba la phah sha ki lad pathai khubor lyngba ka Video, u President jong ka Meghalaya SSA School Association u Bah Aristotle Rymbai u la ïathuh ba ha ka 3 tarik u Naitung, 2023 ka Sorkar Jylla la phah ïa ka Sanction Order sha baroh ki District da kaba bthah ba kin phah ïa ka pisa sha ki Personal Account jong ki nonghikai SSA.
Shuh shuh u la ïathuh, ha kaba ïadei bad ka tulop, u Myntri ka tnat Pule Puthi u la pyntip ba ka tnat Pule Puthi jong ka Sorkar Jylla kan sa pyllait ïa ka pisa tang na ka bynta u bnai Ïaiong bad u bnai Jymmang, 2023 ha ka taiew ban sa wan katba ha kaba ïadei bad ka tulop kaba sah jong u bnai Jylliew yn sa pyllait kham hadien.
