Ka sorkar kan ïeng pyrshah ban ym pyntreikam ïa ka UCC ha Meghalaya : Dr Ampareen

0

Shillong, Naitung 05 : Ka nongai ktien jong ka sorkar jylla, Kong Ampareen Lyngdoh ka la ong ba ka sorkar jylla ka ieng skhem ban ym ailad satia ban ym ailad ïa ka Uniform Civil Code ba kan treikam ha ka jylla.
“Ngi kum ka jylla kumba phi la ïohsngew ïa ka jingkren jong u Myntri Rangbah ba skhem halor kane ka bynta, ngin ym ailad satia ïa ka UCC ba kan treikam ha kane ka jylla Meghalaya,” ka la ong haba kren bad ki lad pathai khubor.
Ka Kong Ampareen kaba dei ruh ka Myntri jong ka sorkar jylla ba dei peit ïa ka Law Department, ka la ong ba haduh mynta kam pat don kano kano ka jingtip kaba poi sha ophis jong ka kaban bthah la ka sorkar ka hap neem ban phah ia ki jingsngew jong ka halor ka UCC.
Ka la ong ruh ba ka sngewthuh ba mynta ba la jan ka elekshon ha ki katto katne ki jylla, ki don ki jingkren bad jingkynthoh da ki nongïalam jong ka ri halor ka jingpyntreikam ïa ka UCC.
Nalorkata, ka ong ruh ba u Myntri Rangbah u la shimkhia bha halor kane ka bynta ha kajuh ka por kum ka jylla ruh ki don la ka jinglong kaba kyrpang kaba ïoh jingïada na ka Khyrnit kaba Hynriew khamtam haba ïadei bad ka khyndew ka shyiap, ka ïathoh shongkurim bad ruh ka jingïoh pateng.
Kumta, ka kyntu ruh ïa ki seng sainpyrthei ba ki dei ban sngewthuh ba kane kadei ka sorkar jong ki kampher la ki don ha kano kano ka liang ha Iing Dorbar hynrei donkam pat ban ïa khun lang kawei na bynta ka jylla Meghalaya. “Ngin sa khot lang ïa ki baroh ha kawei ka rynsan bad ngin sa shim ïa ki jingai jingmut bad syllok lang bad ngin ym ailad satia ïa ka,” ka la bynrap shuh shuh.

Leave A Reply

Your email address will not be published.