Byrngem ïakhih ki nongñiah bad trai kali lada ym siew ïa ka pisa Election bad COVID hapoh 7 sngi

By Mawphor News Desk On Jul 6, 2023

Nongpoh, Naitung, 05: Ki nongñiah bad ki trai kali kiba don hapoh ka shatri jong ka Joint Action Committee of All RiBhoi Passenger Vehicles (JACARBPV) ha ka sngi Balang ki la byrngem ban pynlong da ka jingïakhih, lada ka Sorkar Jylla kam lah ban siew pyndep noh hapoh shitaiew ïa ka pisa halor ka jingpyndonkam jong ka Sorkar ïa ki kali jong ki na ka bynta ka khlam COVID-19 bad ha ka Election-2023 ba dang shu dep shen.
Ka JAC ka la shim ïa ka rai ban pynlong da ka jingïakhih hadien ba ki la phah da ka dorkhas sha u Deputy Commissioner jong ka Ri Bhoi District u Arpit Upadhyaya, la ar sien kynthih, ha kaba mynta ka kynti ha ka sien kaba ar ki la pynpoi biang ïa ka dorkhas sha u Deputy Commissioner ba un ïa kren sha ki bor sorkar ba ka dei ban pyndep ban siew noh ïa ka pisa kaba kim pat ïoh haduh mynta.
Ha ka jingïakren bad ki lad pathai khubor, u Chairman jongka JAC u Bah Bines Makri u la pynpaw ka jingsngewdiaw halor ka jingbym kheiñ snep jong ka Sorkar ïa ka bainong kaba ki dei ban ïoh hadien ba ki la pyndep hok ïa ka kam ba la bynshet da ka Sorkar na ka bynta ka kamram elekshon bad ruh ha ka khlam COVID-19.
U la pynpaw ruh ba mynta ka sngi ka dei ka sien kaba ar ba ka JAC ka la ïakren bad u Deputy Commissioner ka Ri Bhoi ha kaba ha ka sien kaba nyngkong u la ai ka jingkular ba un sa pyndep noh ban siew ïa ka pisa ba ki la trei na ka bynta ka kamram elekshon bad ha ka khlam COVID-19, hynrei kane ka jingkular kam shym la poi shaei shaei ruh ha kaba la shu kular khlem da pynurlong katkum ka jingkwah jong ki trai kali bad ki nongñiah kali.
U Secretary ka JAC Bah Vincent Sohkhwai, u la kren sngewkhia namar lada ka ophis u Deputu Commissioner ki donkam ïa ki ha kano kano ka por ki da byrngem ban pynduh wat ïa ka License lada kim pyndep ïa ka kamram ba la bynshet da ka Sorkar, hynrei hadien ba la pyndep ïa ka kamram kumba la bynshet da ka Sorkar kaba jynjar pat ka dei ka jingsiew kaba ki trai kali bad ki nongñiah ki hap ban ap da ki snem ki snem.